واکداری تا شیفکو کہول آ گدریفنگ کن سنجیدہ اُن، قدوس بزنجو

کوئٹہ: وزیراعلیٰ بلوچستان میر عبدالقدوس بزنجو صوبہ ٹی بلدیاتی گچین کاری تامسٹمیکو مرحلہ نا پرامن اڈ تننگ آ است جمی درشان کرسا گچین کاری تے ٹی سرسہبی دوئی کروک اومیتدار آتے مبارکبادی تسنے و پارینے کہ اومیت ءِ کہ پوسکن گچین مروک چیئرمین و ڈپٹی چیئرمیک تیناعلاقہ غاتا شونداری و السی ویل آتے ایسر کننگ کن تینا کڑدار ءِ پبی وڑ اٹ ادا کیرہ‘ صوبائی حکومت بلدیاتی ادارہ غاتتون پبی وڑ اٹ کمک کیک تاکہ السی ویل آک شیفکو کہول آ ایسر مننگ کیر‘ صوبائی حکومت واکداری تا شیفکو کہول اسکان گدریفنگ اٹ سنجیدہ ءِ‘ او پارے کہ لوکل کونسل تے بھلو فنڈ اس جاری کننگ ءِ پک کننگانے۔ صوبائی فنانس کمیشن جوڑ کننگانے داٹی پین رائے اف کہ بلدیاتی ادارہ غاتا شیفکو کہول آ السی ویل آتے ایسر کننگ اٹ بھلو کڑدار اسے بلکہ شون ہلوک ملک آتے ٹی دا ادارہ غاک مثالی کڑدار ادا کننگ اٹی ءُ‘ بلوچستان اولیکو صوبہ ءِ ہراڑے بلدیاتی گچین کاری تا مرحلہ پورو مسنے۔ بلدیاتی ادارہ غاتا ٹہیفنگ صوبائی حکومت نا سنجیدگی نا درشانی ءِ‘ اولیکو وار بلدیاتی ادارہ غاتا گچین کاری تے ٹی سکیورٹی و امن ءِ برجا تخنگ نازمواری ءِ بلوچستان پولیس لیویز و انتظامیہ ادا کرے‘اللہ نا فضل اٹ گچین کاری مرحلہ پرامن چاگڑد اٹ پورو مس‘ صوبہ نا سکیورٹی ادارہ و الس مبارکبادی کڑزک۔ بلوچستان عوامی پارٹی نا اومیتدار آتا سرسہبی آ است خوش مس‘ اومیت ارے کہ او پارٹی پالیسی و منشور نا وڑ اٹ تینا علاقہ غاتا الس نا شونداری و شونہالی کن تینا لائخی تے کاریم اٹ اتیرہ‘الس اوفتیا ہرا پت انا درشانی ءِ کرسا اوفتے تینا نمائندہ گچین کرینے او اودے پورو کیرہ۔

(خ ن)