نوشکے، بلدیاتی گچین کاری تا مسٹمیکو ریسہ خیر و خوشی اٹ پورو

نوشکے: نوشکے ٹی بلدیاتی گچین کاری تا مسٹمیکو مرحلہ ناگچین کاری تے ٹی یونین کونسل آتا چیئرمین و وائس چیئرمین نا گچین کاریک مسر‘ پولنگ سہب انا 9 بجہ غان بیگہ نا پنچ بجہ اسکان برجا سلیس‘ گچین کاری تیکن 4 پولنگ اسٹیشن جوڑ کننگاسس‘ ہراڑے پوسکن گچین مروک کونسلر آک تینا عہدہ غاتا سوغند ہرفیر و یونین چیئرمین و وائس چیئرمین کن پندار کاغد جمع کرفنگا و گچین کاری تے ٹی کونسلر آک وونٹ تسر۔ یونین کونسل جمالدینی آن چیئرمین ٹھکری شفیع جمالدینی و وائس چیئرمین ہدایت اللہ جمالدینی، یونین کونسل ڈاک آن چیئرمین میر آزاد خان مینگل و وائس چیئرمین منصور مینگل، یونین کونسل مینگل آن چیئرمین میر محمد علی خان مینگل وائس چیئرمین ملک شبیر مینگل، یونین کونسل مل آن حاجی مراد بادینی نا مخ تف چیئرمین عبدالحمید بادینی، وائس چیئرمین ملک اقبال محمدحسنی، یونین کونسل انام بوستان آن چیئرمین عبدالرزاق نورزئی وائس چیئرمین ثناء اللہ محمدحسنی، یونین کونسل گزنلی آن چیئرمین ملک فتح محمد بادینی وائس چیئرمین مجیب الرحمان بادینی بے گو آن گچین مسر‘ یونین کونسل خیصار آن چیئرمین عزیز مینگل، وائس چیئرمین محمد الیاس مینگل، یونین کونسل کیشنگی آن چیئرمین محمد انور مینگل وائس چیئرمین عنایت اللہ، یونین کونسل مل آن منظور احمد گورگیج چیئرمین، وائس چیئرمین حافظ عابد، یونین کونسل بادینی آن چیئرمین میر محمد جان بادینی و وائس چیئرمین میر خان بادینی بے گوا گچین مس‘ یونین کونسل احمدوال آن چیئرمین سردارزادہ خلیل احمد محمدحسنی، وائس چیئرمین ثناء اللہ لانگو، یونین کونسل باغک آن چیئرمین میر عبدالرحمان لانگو وائس چیئرمین شبیر احمد ساسولی گچین مس۔ ضلع ٹی جمعیت علماء اسلام و بلوچستان نیشنل پارٹی نا نیام اٹ سخت گو مس ولے دا وخت اسکان نا غیرسرکاری و بے پک نتیجہ نا رد اٹ جمعیت علماء اسلام مون اٹی ءِ۔ پولنگ نا وخت آ سکیورٹی نا سخت بست وبند کننگاسس‘ پولیس و لیویز فورس انا کارندہ تعینات کننگاسس‘ ضلع ٹی پرامن وڑ اٹ بلدیاتی گچین کاری تا مسٹمیکو مرحلہ پورومس۔

(تلار حوالکار)