زیبا غا مکران……سیل و چکر…… ( 11)

بلوچستان اٹی منہ پوسکن ئُ میڈیکل کالج جوڑ کننگ نا بنداوی فیصلہ 2014-15ء ٹی مسوسُس۔ ہندافتیان مکران میڈیکل کالج تربت ہم اسٹ ئِ، ولے دا کالج اٹی باقاعدہ کلاس آتا بنا مئی 2018ء ٹی مس۔ منہ وخت اسکان تو دا جاگہ نا خوانوک آک شار انا اسہ تعلیمی ماڑی اسیٹی خوانسا کریر، ولے ہراتم 2020ء اٹی میڈیکل تعلیم نا مچ آ گرج آتتون ماڑی جوڑ مس، تو ولدا مون آ کلاس آک شار اٹی ہنداڑے مننگ بنا کریر۔

ڈاکٹر اسلم بلوچ صاحب تون چا کُننگ آن پد اوڑتون اوار نن کالج نا چندی بشخ آتا سیل ئِ کننگ کن بش مسن۔ کل آن مُست ایڈمن بلاک ئِ ہُران۔ ہرا اسُل جتا ئُ جاگہ اسے آ ئس، و اوڑے بھاز آ کمرہ غاک ئسر۔ ایڈمن بلاک اٹی چندی خوانوک آ مار و مسنک تینا کاریم تا رد اٹ ساڑی ئسرہ۔ داکان پیش تمان تو کالج نا ایلو جاگہ غاتیا ہنان۔ دافتا سرجم ئِ مننگ کیک پاننگ کپر، ولے ہرا خاص انگا بشخ آک ئسر، اوفتا زرس معلومداری ایتوہ۔

داخس مُر انگا علاقہ ٹی میڈیکل کالج مننگ آن پد ہم داڑے چار بیچ اٹی 200 نا کچ خوانوک ئُ مار و مسڑ ئسر۔ اوفتا کلاس اٹی دن تو 100 چنا غان زیات تولنگ نا جاگہ الو، ولے کلاس اٹی خوانوک آتے کن تولنگ و خواننگ نا جوان ئُ وڑ و ڈول اس ئس، اوکان پیش تمان تو ایلو بشخ آتیا ہنان، ہرافتیٹی اٹانمی Autonmy، فزیالوجی Physiology بائیو کیمسٹری Bio-chamisty، فارمیسی Pharmacy، فرانزک، کمیونٹی میڈیسن، سرجری، چنائی بشخ، گائنالوجی، ای این ٹی اوار ئسر۔ ہرافتے میڈیکل نا مضمون آتیکن جوڑ کننگانے، اوڑے گچین ئُ لیبارٹری ئسر، ہرا تعلقدار آ سامان آن پُر ئسر۔ ای ذاتی وڑ اٹ تو دا لیبارٹری و اوفتا رد اٹ ہرا معلومداری جئی آ ڈاکٹر آتیان ملا، اُست جم مسٹ۔ پین مف دا جاگہ نا خوانوک آک عملی وڑ اٹ ہم داڑے پہہ مرسا خواننگ ئِ تینا سرجم کننگ کیرہ۔

اوکان پد کالج نا ارا ڈاکہ ئی زیبا غا ماڑی نا لائبریری ٹی ہنان۔ ہراڑے کم و وَد مسہ درزن آن زیات کتاب کن بک شیلف / الماری جوڑ ئسر۔ ولے دافتیان بھاز آک خورک ئسر۔ داڑان ای بھاز ڈکھیا مسٹ کہ باید ئس کہ دا گچین آ میڈیکل کالج اٹی کتاب مچے زیات مروسس۔ ڈاکٹر اسلم بلوچ صاحب تون ای دا کمتی نا رداٹ ہیت کریٹ و دا قول ہم کریٹ کہ الخدمت فائونڈیشن بلوچستان تینا کتاب آتا کمک تروک آتتون خڑکی کرسا لائبریری کن میڈیکل نا بشخ انا کتاب آتا فراوانی نا خواست کیوہ۔

لائبریری ئِ سیل کننگ نا وخت آ نن اسہ ہندن ئُ جاگہ اسے آ ہنان، ہراڑے مچ آ کالج نا رکھ و سنبھال نا اسہ پوسکن ئُ وڑ و ڈول اس ئس۔ درزن اسے آن زیات کیمرہ ئسر، ہرا کالج نا چندی جاگہ غاتیا خلوک ئسر، اوفتا اسہ بھلو اسکرین اسے نا کمک اٹ جاچ ئِ ہلنگ نا بست و بند ئس۔ ای خیال کریٹ کہ مچ آ کالج ’’کیمرہ نا نظر‘‘ آن چَپ اف۔

اوکان پد کالج اٹی ساڑی خوانوک آ مار و مسن تے کن جتا جتا رہینگ انگ نا ہاسٹل ئِ خنان۔ مار تے کن کالج اٹی جوڑ گچین آ میس انا بارو اٹ ننے پاننگا۔ کالج اٹی گمان نا کچ ہچ ئُ پی ایچ ڈی استاد اَلو، ولے ایم فل و پی سی پی ایس کروک آ استاد آک ئسر۔ او ایلو صوبہ غاتیان ئسرہ۔ اوفتے کن ہم رہینگ انگ نا آسراتی ئس، ہراکہ گچین ئُ ماڑی ئسر۔ داڑے خوانوک آ مار و مسن تتون تو ننا خاص ئُ ہیت و گپ اس متو۔ ائو مچ آ کالج نا دورہ نا وخت آ اوفتے داڑے اوڑے گوئی کننگ آ خنان۔ و اومیت ئِ کہ پاکستان میڈیکل کونسل (پی ایم سی) دا کالج ئِ گچین آ آسراتی تا سوب آن بھاز زو رجسٹریشن ترو، و دا جاگہ نا خوانوک آک گچین ئُ خواننگ اسے تون بلوچستان نا ہسپتال آتیٹی خذمت سر ترور۔

ہفتئی تلار

تاک:02

14-08جنوری 2022ء

پنہ: 02