ننا حکومت 3 سال اٹی 29 ارب نا ڈٹ بنا کرینے، احسن اقبال

اسلام آباد : بنجائی وزیر ڈٹ بندی، شونداری، اصلاحات و خصوصی گام گیج پروفیسر احسن اقبال پارینے کہ اینو دنیا پوسکن آ سائنسی انقلاب نا دنگ آ سرمسنے، چین پاکستان نا ڈکھ وسکھ انا سنگت ءِ، چین تھرکول کن زرکاری کرے و ٹیکنالوجی ہم تس، نَود نا دہائی، ننا ملک اٹی پاور گیم ننے پدی دِھکہ تس۔ داخیال آتا درشانی ءِ او چارشنبے نادے آ پاک چائنا اسپیس سمپوزیم آن تران کرسا کرے۔ بنجائی وزیر پارے کہ اینو دنیا پوسکن آ سائنسی انقلاب نا دنگ آ سرمسنے، سائنسی ریسرچ انسانی شونداریءِ بوسٹرز خلکنے، اینو آرٹفیشل انٹیلی جنس، بگ ڈیٹا و ایلو ایمرجنگ فیلڈز انڈسٹریل انقلاب اتنگ ءِ۔ اوپارے کہ چین پک کرے کہ او پاکستان نا بیرہ لوزآتا سنگت اف، پاکستان نا ڈکھ سکھ انا سنگت ءِ، ہراتم اسہ ملک اس ہم زرکاری کتوکہ، چین 46 ارب ڈالر نا زرکاری اٹ سی پیک نا بناءِ کرے۔ دا زرکاری مچ آ دنیا ٹی پاکستان نا شناخت ءِ بدل کرے، ننا حکومت 3 سال اٹی 29 ارب نا ڈٹ آتا بناءِ کرے، ایران و سعودی عرب نا تیل انا کوڑی تا بریبر تھراٹی کولانا کوڑی ارے۔ چین تھرکول کن زرکاری کرے و ٹیکنالوجی ہم تس۔ ہمووخت آآ یورپی ملک آک ہم سی پیک ڈٹ آتا بشخ جوڑ مننگ خوائسرہ۔ اوپارے کہ 1960 اٹی پاکستان ءِ ایشیا نا پوسکن آ جاپان پاننگاکہ۔ نن 1965 نا جنگ انا بناءِ کرسا تینے پدی دِکہ تسن۔ 1990 ٹی ننا پالیسی تا سوب آن ردوم کچ 7 ٹک 7 درسد اسکان سرمس۔ 1990 نا دہائی ننا ملک اٹی پاور گیم ننے پدی دِھکہ تس۔ ہمووخت انا بھارتی وزیر خزانہ من موہن سنگھ پاکستان آن اصلاحات نا کاپی اس خواہس ہراڑا سرتاج عزیز بھارتی وزیر خزانہ ءِ اصلاحات نا کاپی تس۔ بھارت ہمو اصلاحات آتیا عمل کرے و 2000اٹی او ننے پدی اِلا۔ 2016ٹی چین نا ہر کمپنی نا دفتر اسلام آباد اٹی ملنگاکہ، ہمووخت آ چین نا نجی بشخ آن 40 ارب ڈالر نا زرکاری گمانی ئس۔ 2018ٹی اتوک آ بدلی چین ءِ ہم کٹہرے ٹی سلفے۔ تدوک آ دور ءِ حکومت اٹ سی پیک تون گنڈوک ڈٹ آتے سکنڈلائز کننگا۔ داوڑنا رویہ نا سوب آن چینی زرکاری داکان ہنا۔ چینی زرکارآتا پت ءِ ٹھیس تننگا۔ 2016ٹی نن چین اتون اواری اٹ اسپیس ٹیکنالوجی نا ڈٹ انا بنا ءِ کننگا۔

(اے پی پی)