گوادر یونیورسٹی،داخلہ نا کچ و تعلیمی شونداری سرسہبی اسے، وائس چانسلر

گوادر : وائس چانسلر جامعہ گوادر پروفیسر ڈاکٹر عبدالرزاق صابر اڈ ہلوک گوادر یونیورسٹی اکیڈمک کونسل نا مسٹمیکو دیوان نا کماشی ءِ کرسا جوان ءُ کچ اسے ٹی پوسکن آ داخلہ و تعلیمی شونداری کن گوادر یونیورسٹی نا انتظامی عملہ و فیکلٹی باسک آتا کوشست آتا ستا ءِ کرے۔ دیوان اٹ پرو وائس چانسلر پروفیسر ڈاکٹر سید منظور احمد، رجسٹرار دولت خان، ڈائریکٹر فنانس شفیع محمد، ڈین فیکلٹی آف سوشل سائنسز ڈاکٹر جان محمد، چیئرمین کامرس ڈیپارٹمنٹ اینڈ ڈائریکٹر کیو ای سی ڈاکٹر کمبر فاروق،، چیئرمین ایجوکیشن ڈیپارٹمنٹ مختار بشیر، چیئرمین مینجمنٹ سائنسز ڈیپارٹمنٹ فدا حسین، چیئرمین کمپیوٹر سائنس ڈیپارٹمنٹ حفیظ اللّٰہ، لیکچرار شہناز نور، سعدیہ نصیر، ہیم گل و نا لائبریرین غلام سرور بشخ ہلکر۔ وائس چانسلر پروفیسر ڈاکٹر عبدالرزاق صابر آب انا پٹ و پولی و علمی کاریم تا جوانی کن جوان ءُ چاگڑد و آسراتی فراوان کننگ نا پارت کرے۔ کونسل اکیڈمک کونسل نا ارٹمیکو دیوان نا منٹس ءِ ودفے۔ داٹی یونیورسٹی ٹی جاست و پاستی کاریم تا جوانی کن تعلیمی شونداری نا بابت جتا جتا ویل آتیا ہیت وگپ کریر و اوفتے ایسر کننگا او وخت آ تران کرسا وائس چانسلر بشخندار آتے پارے کہ گوادر نا جغرافیائی و جہانی اہمیت نا بابت یونیورسٹی ٹی بنائی وڑاٹ سمندری گڑا، سی پیک، پوسکن آ تکنیکی و سائنسی علم انا بابت مضمون خوانفے۔ وخت اس کہ گوادر یونیورسٹی ءِ زوت اس صوبہ و ملک انا بھلا یونیورسٹی تا بریبر جوڑ کننگ آن بیدسس جہانی کہول آ منفنگک۔ وائس چانسلر پاک چائنا ٹیکنیکل اینڈ ووکیشنل انسٹیٹیوٹ ءِ فعال کننگ کن جی پی اے تون اسہ معاہدہ اسے ہیت وگپ کننگ اٹ پرو وائس چانسلر پروفیسر ڈاکٹر منظور احمد نا کوشست آتا ستا ءِ کرے ہراکہ چار فریقی معاہدہ نا رداٹ یونیورسٹی نا بابت اٹ کرینے۔

(خ ن)