القابض جل جلالہٗ: 

القابض جل جلالہٗ: 

تنکی کروک آ

الباسط جل جلالہٗ: 

فراخی کروک آ

دا ہڑدوسرآ اسم مبارک آتا بارو اٹ مسہ سِفت نوشتہ کننگک۔ دا اسم مبارک آک قرآن پاک اٹ دا وڑ اریر: ”واللہ یقبض و یبسط“

-1 دا آیت شریف نا بارو اٹی ملا علی قاریؒ فرمائفک کہ اللہ تعالیٰ ہر گڑا ٹی تنکی و فراخی فرمائفک، او اخلاق مرے یا رزق۔ جون مرے یا روح، ہرا وخت اللہ تعالیٰ دافتیٹی تنکی کے تو ہچ ءُ زوراک اس دافتیٹی فراخی کننگ کپک۔ و اگہ خدا پاک اوفتیٹی فراخی کے تو کس اس اودے منع کننگ کپک۔ انتئے کہ ”القابض جل جلالہٗ“ ہم اودے و ”الباسط جل جلالہٗ“ ہم اودے، یعنی تنکی و فراخی نا مالک تنیا ہمو ذات ءِ، پین کس اس اف۔ مطلب دادے کہ اللہ تعالیٰ قدرت نا خواجہ ءِ، اونا منشا کس اسے آ رزق ءِ تنک کے یا کس اسے آ رزق ءِ فراخ کے۔

-2القابض جل جلالہٗ والباسط جل جلالہٗ ہمو ذات ءِ کہ موت انا وخت آ روح تے بدن تیان کوز کیک، و زندگی تننگ کن روح تے بدن تیٹی شاغک۔ 

-3بھاز آ عالم دین تا قول دادے کہ القابض جل جلالہٗ و الباسط جل جلالہٗ ہمو ذات ءِ کہ است آتے تنک و فراخ کیک، یعنی بندغ اس کہ اللہ نا حکم ءِ دپک بلکن گمراہی نا کسر اٹ کاہک، گڑا ”القابض جل جلالہٗ“ اونا است ءِ اونا گناہ و تینا ناراضی نا سوب آن تنک کیک، ولدا اونا گیشتری وخت فریشانی ٹی تیر مریک۔ و ہرا بندغ کہ رب انا حکم ءِ درے یعنی ہدایت نا کسر اٹ ہنا گڑا ”الباسط جل جلالہٗ“ اونا است ءِ اونا نیک انگا عمل آتا و تینا راضی مننگ نا سوب آن مَلِک و فراخ کیک۔و او گیشتر وخت ءِ خوشی ٹی تیر کیک۔

از ابن الحسن ابابکی