مراد صابر (برج حوت)

مراد صابر (ودی دے 10 مارچ 1988ء) نا برج ”حوت“ (Pisces)، حاکم استار ”مشتری“ (Neptune)، تب ”دیری“ (آبی)، نشانی ”ارا مچھی“، پیشن نا ہزوہ ”نت“، تہہ انا ہوزہ ”جغر“، ہم تب برج آک ”سرطان، عقرب“، چَپ تب برج آک ”جوزا، سنبلہ، قوس“ اسہ وڑ تب انا برج آک ”حمل، ثور، جدی، دلو“ بے تعلق برج آک ”اسد، میزان“، ہجی نا حرف آک ”د،چ“، ودی دے ئی عدد ”1“، مرکب عدد ”25“۔ لائف پاتھ ”3“ ءِ۔

فلکیات نا چاہندار آتا رد اٹ برج ”حوت“ والا بندغ بھاز خواری کش مریک۔ دے و نن کاریم کرسا تینا کاریم ءِ ہر وڑ اٹ سرجم کننگ نا شوق تخک۔ ہرا کاریم اونا چہوا نا مرے اوٹی بھاز خواری کیک۔ ہرا کاریم اٹی اونا چہوا مف اودے تینا زند انا بشخ جوڑ کپک۔ مستقل مزاج مریک و لے دولت و شہرت کن تینے خوار و ذلیل کپک، بلکہ عزت اٹ سرسہبی نا خواہندار و تینے ہر بدنامی آن بچفنگ نا کوشست اٹی مریک۔ تینا زمواری تے سرجم کننگ کن ہر کچ اِسکان کوشست کیک۔ برج ”حوت“ والا خواری تون اوار محبت کروک ہم مریک۔ محبت اٹی تو سفا جذباتی کچ اِسکان مونی ہِننگ کیک۔

برج ”حوت“ انا اسہ جوانی اس دا ہم ارے کہ دا برج والا ایلوفتا نزوری تیان فائدہ دوئی کننگ نا کوشست کپک۔ ایلوفتا عیب آتے ڈکنگ نا کوشست کیک و کس اسے طعنہ، شغان پیغور تننگ نا عادت اف۔ سنگتی ٹی وفادار، تینا سنگت ءِ ہر وڑ اٹ تکلیف آن بچفنگ نا خواہندار مریک۔ ایلوفتے کن تینا جان نا قربانی تننگ اِسکان تیار مریک۔

برج ”حوت“ والا تینا تعلقدار آ بندغ آتے اوفتا جوانی کن پاہک، اوفتا زند اٹی جوانی اتنگ کن اوفتے جوان ءُ سلاہ مشورہ ایتک۔ کس انا کہ کمک ءِ کرے اوڑتون ہچ ءُ جوفہ اس تے مفک۔ کست و کاڑ آن پاک مریک، کس انا بدی ءِ خواپک، کس اتون بدی کننگ نا سوچپک۔

برج ”حوت“ والا تاثیر تخوک مریک۔ استار نا رد اٹ ”حمل“، ”ثور“، ”جدی“، ”دلو“ تون جوان سنگتی کننگ کیک۔ دا والا تتون ہر وڑ اٹ کمکار مریک۔ ولے برج ”جوزا“، ”سنبلہ“، ”قوس“ والا تے تینے آن مُر تورے تو اوڑکن جوان مرو، آخا تو نسخان دوئی کننگ نا بھلو خطرہ اسے تون مون تروئی تمک۔

مراد صابر مطلب دا کہ برج ”حوت“ انا خواجہ سیل و سواد نا بھاز شوقی مریک۔

امر کہ ایلو بندغ آتے ٹی بھاز انگا جوانی تتون اوار چندی نزوریک ہم مریرہ۔ ہندا وڑ برج ”حوت“ والا تینا بے حساب جوانی تتون اوار منہ نزوری تا ہم خواجہ ءِ۔ دن کہ زو غصہ کننگ، خار اٹی بننگ و نسخان کننگ، خار اٹی بس تو خار کچ آن زیات مریک۔ دا بندغ تینا کنٹرول آن پیشن مریک۔ دا کل آن پدہم بھاز زو خار ءِ چٹفوک ولدا اسہ نارمل ءُ بندغ اس جوڑ مریک۔ مطلب کہ خار اونا اسہ وختی ءُ نزوری اس ارے ولے مدامی آخا۔

مراد صابر(ودی دے 10 مارچ 1988ء) نا ودی دے ئی عدد ”1“ ءِ۔ نومرالوجسٹ آتا رد اٹ ودی دے ئی عدد ”1“ والا بندغ آک بھاز خواری کش مریرہ۔ خودار مریرہ، وتواجہ ئی دوست مریک تا، ایلوفتا حکم اٹ کاریم کننگ دوست مفک تا۔ ہمو وخت جوان ءُ کارکڑد اس نشان تننگ کیرہ ہرا وخت کہ اوفتے آزاد موڈ اٹی کاریم کننگ کن اِلنگے۔ عدد ”1“ والا بندغ لیڈری نا ہم جوانو ءُ لائخی اس تخک۔ دا عدد نا بندغ آک جوان ءُ دانشور، مطالعہ نا شوقی مریرہ۔

مراد صابر نا مرکب عدد ”25“ ءِ۔

(Murad Sabir 4+6+2+1+4=17 –3+1+2+1+2=9–17+9=25)

نومرالوجسٹ آک پارہ کہ عدد ”25“ اسہ موافق ءُُ عدد اسے۔ دا عدد دا پاش کیک کہ مرکب عدد ”25“ تخوک آ بندغ 25 یا 34 سال نا عمر اٹی حقیقی زند انا بنا ءِ کیک۔ دا عدد دیر اتون تعلقدار ہر گڑا غا حکمران ءِ، دا عدد والا بندغ آ پین بھاز زند انا بشخ آتیان بیدس اسہ جوان ءُ مصنف اس، اسہ جوان ءُ فوٹوگرافر اس ہم مننگ کیک۔

مراد صابر نا لائف پاتھ عدد ”3“ ءِ۔ علم الاعداد نا چاہوک آتا رد اٹ لائف پاتھ عدد ”3“ اسہ اُست بڈی والا عدد اسے۔ دا عدد تخیل و تخلیق نا گیگ ایتک۔ دانا بنداوی لوز آک ”عقل، تخلیقی لائخی، زندگانی تون محبت“ ءِ۔ دا لائف پاتھ عدد نا خواجہ خوش رہینگک، ہنر آسانی اٹ، زو ہیل کننگ کیک۔ لائف پاتھ عدد ”3“ نا منفی اثر آک دادو کہ دا بندغ زو مونجا مریک، پانے خوش رہینگک ولے زندگانی ٹی بھاز زو بے قرار ہم مریک۔

براہوئی زبان نا ایلو برج ”حوت“ والا ادیب شاعر آتے ٹی پروفیسر عبدالحمید شاہوانی (ودی دے 11 مارچ 1954ء)، حاجی محمد عثمان بنگلزئی (ودی دے یکم مارچ 1943ء)، عنایت ساغرؔ (ودی دے 3مارچ 1984ء) و اکرم ساجد (20 مارچ 1982ء) اسک اوار ءُ۔

ہفتئی تلار
تاک: 33
10-04ستمبر 2021ء
پنہ: 05