تخلیق رد عمل اسے

دنیا ہراتم آن کہ گلوبل ولیج اس جوڑ مسنے، پد تموک آ راج آتیا شون ہلوک آ راج آتا کیہی شونداریک پیدوار مننگ اٹی ءُ۔ دے نیام آ اسہ پوسکن ءُ گڑاس تخلیق مننگ اٹی ءِ۔ و دا تخلیق آک زند انا ہر بشخ اٹی مرسا کننگ ءُ۔ منہ وخت مست حوال اس بس کہ ”سان فرانسسکو نا اسہ ’مؤجد‘ اس تینا سائیکل ءِ دز آتیان بچفنگ کن اسہ پوسکن ءُ وَڑ اسے نا کلف اس جوڑ کرینے، ہرادے غلط وَڑ اٹ ملنگ تون بھاز گند کروک ءُ گیس اس پیش تمک، ہراڑان دزی کروک آ کواک و الٹی کیک، دادے ’اسکنک لاک‘ نا پن تننگانے۔ دا دنیا نا اولیکو ’بائیک لاک‘ یعنی سائیکل نا کلف ءِ ہرا دُز ءِ تینا رد عمل ءِ نشان ترسا گیس اس کشک، ہراڑان الٹی بریک، دا کلف ءِ ڈینیئل ازووسکی جوڑ کرینے، ہرانا اسہ سنگت اسے نا سائیکل اس اسٹور نا پیشن آن دزنگاسس۔ ڈینیئل دا کلف ءِ “U” انا دروشم اٹ کاربن اسٹیل آن جوڑ کرینے۔ کس اس اگہ دادے کاٹ کننگ یا غلط وَڑ اٹ ملنگ نا کوشست کرے تو کلف آن بھاز پین وَڑ ءُ گند کروک ءُ گیس اس پیش تمک، ہرانا گند آن ہمو بندغ ءِ الٹی بریک، و او الٹی کیک، و دزی آ ہلنگک۔ داکان بیدس دُز ءِ ساہ ہلنگ اٹ ہم مشکل پیش بریک۔ ڈینیئل دا کیمیکل ءِ بھاز آ بندغ آتیا آزموندہ کرینے، و غٹ پارینو کہ دا سگنگ مفک۔ گیس انا گند 2 فٹ مُر اسکان ہم سگنگ مفک، 99 درسَد بندغ داڑان الٹی کرینو، داڑسکان کہ 10 فٹ انا مُری آن ہم دانا گند ءِ محسوس کننگ مریک۔“ دا کلف اسہ رد عمل اسے نا سوب آن جوڑ مسنے، و او رد عمل راجی زند اٹ بدلی اتنگ کن مسنے۔ یعنی دُزی نا توننگ کن۔ نن دا پاننگ کینہ کہ ہرا بندغ دا کلف ءِ جوڑ کرینے، یخین اٹ او اسہ حساس ءُ بندغ اسے، کہ اونا سنگت نا سائیکل دزنگا تو او اسہ ہندن ءُ کلف اس جوڑ کرے، کہ ہرانا کمک اٹ سائیکل دزی نا کسر ءِ توننگ مرے۔ انتئے کہ داکان مُست ’انسانیت نا فلاح‘ کن اخس کہ ایجاد مسنو، اوفک رد عمل نا وَڑ اٹ مسنو۔

ہفتئی تلار
تاک: 11
19-13 فروری 2021ء
پنہ: 01