۔’’بلوچ تاریخ کی قدیم شخصیت‘‘ نا جاچ اس(2)۔

محبوب شاہ

By Hafeez Baloch On Feb 7, 2022

Get real time updates directly on you device, subscribe now.

قومی تاریخ ءِ خواننگ آن پد جغر آن سوج اس ترک کیک، انت بلوچ راہشونک وطن اٹ انگریز نا بوٹ آتے خن تا زی آ سگوسر؟ انت لمہ نا گد ءِ چکوک آتا مون آ خن تا پڑی ءِ بٹوسر؟ یا ترند ءُ توار اسے ٹی دشمن ءِ ہکل ایتوسر، تو یخین اٹ اوفتا ہکل نا توار و اوفتا خیسن دتر ننے تاریخ اس نوشت اٹ تس۔

تاریخ شاہد ءِ بلوچ لمہ غاک مدام تینا چنا تے عزت و غیرت نا لولی تسنو، ہندا سوب ءِ جنگ آتیٹ مدام بلوچ ورناک کاٹم تسنو، انگریز آتا گام ءِ توننگ کن جنگ آتیٹ شرف انا چس ءِ ہلکنو، ڈغار اٹ کاٹم دسینو، تاریخ نا بھرم ءِ ہرفینو۔ جنگ آتا کشت کشار اٹ زند ءِ قوم انا تاریخ کن ندر کرینو۔

قومی تحریک آتا تاریخ ءِ خواننگ آن ملی است آن سوال کیک، انت وخت اس مظلوم آ قومک شرحال مننگ کیرہ؟ انت غلام آ قومک تینا زند ءِ خوشی ٹی گدریفنگ کرور؟ انت غلام اس دنیا نا چس آن باخبر مرو ءِ؟ دا ہمو سوج آک ءُ، ہرافتا ورندی ءِ ہر دور انا غلام تینا است اٹ تینے آن تینٹ کیک، ہندا سوج آک اخیر تاریخ دان تا خف تیا تمرہ۔

تاریخ دان بھاز حساس مریک۔ او تینا تخلیقی و تحقیقی لائخی ٹی ہندا سوج آتے جہان کن روشنائی نا کسر اس جوڑ کیک۔ کسر ءِ خننگ تون غیرت نا گنوک آک خوانندہ غاتا چندی شوقیک ہندا کسر آ ہندا سفر اٹ اوار تمرہ۔

’’بلوچ تاریخ کے قدیم شخصیات‘‘ کتابی دنیا ٹی گام تخوک آ پوسکن آ کتاب ءِ۔ دا کتاب پروفیسر ڈاکٹر فاروق بلوچ نا مالہ و لنگار لشی و لاب انا بھرم ءِ۔ قوم انا متکن آ تاریخ و قبیلہ غاک قوم وطن نا تہذیبی میرات آک ءُ۔ جہان اٹ چٹ تروک آ دا مڈی آن قوم ءِ درستی راستی، تہذیب، رسم و رواج نا خاہوتی جوانی گندہی نا بارو اٹ سما تمک۔ دنیا ٹی دن ءُ ہچ ءُ تاریخ اس اف، ہرانا تاریخ ڈغار نا تل اٹ یا پنہ غاتا باٹغ آ تالان مف۔ بلوچ قوم ہندا جواہر آتا لعل اسے۔ قدیم بلوچ پیرہ غاتا تاریخ نا نوشتوک بہادر آتا دلیری نا خشت ءِ قوم و وطن نا بنداو ءِ بلوچ قوم آتا اسٹی نا کونٹ ءِ مون انگا گدان نا سیخا ءِ مش تا کیرغ آن تینا قلم نا شِل انگا بُوز اٹ ختسا کشانے۔ قدیم تاریخ نا پاٹی آ سندوخ آتیان قومی راہشون آتا اوڑدہی سَنت و سیوت نا شرفدار آ تاریخ ءِ بروک آ نسل اکن پاش کرینے۔

ڈاکٹر فاروق بلوچ ءِ اگہ تاریخ نا پیراڑو پاو تو رد مفروٹ۔ انتئے کہ او پٹ و پول نا وخت آ تاریخ نا رند ءِ ہرفک، گند کشسا دمب آتا زی آ سد آ سال متکن آ سنگر آتا تہٹی سر مریک۔ قلعہ غاتا کپی تا در و دیوال آتا جاچ ءِ ہلیک، اونا مرواری تا خواری ٹی آجوئی، رواداری تین پہ تینی نا یاقوت نا خوار تیان بلوچ قوم انا زغم خلوک آ تاریخ ءِ تسبیح نا خوار تیانبار کڑو کڑو آ خلانے۔ دا کتاب اٹ دشمن تون جنگ کروک آ کشاش آتیان بیدس بلوچ کلچر روایت آتا پاسداری اسہ پڑچ آ تولنگ بش مننگ رہینگ انگ نا تاریخی اہمیت ءِ ادبی بُٹ آ تخوک قومی نظریہ ءِ قومی حیثیت ءِ کاٹم آتا قبائلی طاقت ءِ ہر وڑ اٹ کتاب نا پنہ غا نوشتہ کرینے۔

راستکی دادے کہ قوم انا مڈی خالی کماش آتا گدرینگوک آ زند انا آدینک اف، بلکہ است ءِ و خن تے پدین کروک ءُ سرمہ ہم اریر۔ فاروق بلوچ اٹ دا لائخی بے کچ ءِ، اوڑتون گم گار آ تاریخ نا ہنر اس ارے۔ او مدام بلوچستان و بلوچ قوم انا رومانوی داستان تیان تاریخی جنگ آتسکان تاریخ نا ہر مڈی ءِ تینا قلم نا لشی ٹی روتنگ ءِ۔ ہر بندغ نا جول اٹ شاغسا کننگ ءِ۔ اونا خواری تا کمک اٹ تاریخ نا پڑ آ تحقیق نا چکل اس پاش کرینے، ہراڑان بلوچ ورنا تیان بیدس جہان نا ہر ملاس تینا خوا ءِ پر کننگ کیک۔

ہفتئی تلار

تاک:45

27 نومبر 03- دسمبر 2021ء

پنہ: 08