پاک فوج ملکی سلامتی نا دفاع کن سنبرینگوک ءِ، آرمی چیف

راولپنڈی : آرمی چیف جنرل سید عاصم منیر پارینے کہ پاک فوج پاکستان نا وتواجہی و علاقائی سلامتی کن ہر وڑ انا خطرہ غاتتون مون تننگ کن سنبرینگوک ءِ و کشمیری تا کاز انا مخ تفی کن سلوک ءِ‘ کشمیر نا ویل انا اقوام متحدہ نا قراردادنارد اٹ ایسر نا خواہندار ان۔ پاک فوج انا شعبہ تعلقات عام (آئی ایس پی آر) نا رد اٹ آرمی چیف پنچ شنبے نادے لائن آف کنٹرول نا خڑک انا سیمی علاقہ غاتا دورہ ءِ کرے۔ آرمی چیف ءِ ایل او سی نا حالیت و تعینات فارمیشن تا آپریشنل تیاری تا بارو اٹ بریفنگ تننگا۔ آرمی چیف سیمی چوکی تیا تعینات افسر وورناتتون اوڑدہی کرے‘ او فوجی تیا زور شاغا کہ او ہندی آبادی ءِ ہر وڑ انا کمک فراوان کیر‘ سوگو سلر و بھاز خلوص و استخواہی اٹ تینا فرض آتے ایسر ایتر۔ آرمی چیف پد ریسہ سنبرینگوک مننگ‘ گچین آپریشنل تیاری و بڑز حوصلہ غاتے برجا تخنگ آ افسر و ورناتا ستاءِ کرے۔ جنرل عاصم منیر مستی پارے کہ پاک فوج ہر وڑانا خطرہ نا برخلاف پاکستان نا وتواجہی و سلامتی نا دفاع کن سنبرینگوک ءِ وکشمیری تا انصاف آ ساری کاز انا مخ تفی کن سلوک ءِ و اقوام متحدہ نا قرارداد نا رد اٹ جموں و کشمیر نا ویل انا ایسر ءِ خواہک۔ داکان مست ایل او سی آسر مننگ آ کور کمانڈر راولپنڈی کور آرمی چیف ءِ بخیر کرے۔

(آن لائن)