فل کورٹ جوڑ متو تو سیاسی و آئینی بحران ودی مریک، اعظم تارڑ

اسلام آباد : بنجائی وزیر کانود اعظم نذیر تارڑ پنجاب،کے پی نا گچین کاری تا بابت سپریم کورٹ نافیصلہ غا اسہ وار ولدا فل کورٹ ٹہیفنگ نا خواست کرسا پارینے کہ اگہ فل کورٹ جوڑ متو تو ملک اٹ سیاسی و آئینی تنکی ودی مریک‘ دا باندات آ 13 باسکی فل کورٹ تولفنگے ہرا کل باندات آتے ایسر کے‘ گچین کاری تا وڑ وڈول آئین اٹ پک ءِ‘ مچ آ ملک اٹ قومی و صوبائی گچین کاریک بایدے اسہ وخت آ مریر۔ اقلیتی فیصلہ ءِ بایدے نافذ کننگپ۔ پنچ شنبے نا دے اسلام آباد اٹ جہانی میڈیا تون ہیت وگپ کرسا بنجائی وزیر کانود پارے کہ پنجاب اسمبلی ءِ جھیڑہ ئی وڑ اٹ پرغنگا‘ وزیر اعلیٰ پنجاب اسمبلی ءِ پرغنگ نا سمری ءِ گورنر پنجاب آ راہی کرے‘گورنر سمری آ دستخط کننگ آن نمن مس و اسمبلی 48گھنٹہ غان گڈ تینٹ پنا ہراکان گڈ باندات عدالت اٹ ہنا۔ کے پی کے و پنجاب اٹ گچین کاری تا بابت پٹیشن تا سماعت مننگ اٹی ءِ‘ عدالت سلابت اٹ الیکشن کمیشن ءِ تاریخ تننگ ناپارے‘ الیکشن کمیشن پوسکن ءُ تاریخ اس تس تو جھیڑہ اس بش مس۔ الیکشن کمیشن وتواجہ و واکدار ءُ ادارہ سے۔ بنجائی وزیر کانود و انصاف سینیٹر اعظم نذیر تارڑ پارینے کہ سپریم کورٹ نا 13 باسکی فل کورٹ بنچ غٹ باندات آتے ایسر کے، سیاسی جماعت و بار کونسل آتا فل کورٹ نا خواست ءِ مسترد کننگا، سماعت اٹی سیاسی جماعت آتا موقف ءِ بِننگتو، عدالت و حکومت اٹ ٹکراؤ نا حالیت بایدے مف، اگہ پنجاب اٹی اول صوبائی گچین کاری تے کرفنگک تو قومی اسمبلی نا گچین کاریک زہمی مریرہ، آئین نا رداٹ گچین کاری تا شفاف اڈتننگ کن نگران سیٹ اپ نا مننگ المی ءِ، امن و ایمنی نا حالیت آتا رداٹ مستین اٹی ہم گچین کاری تا تاریخ ءِ بدل کننگانے۔ بنجائی وزیر کانود پارے کہ آئین نارداٹ گچین کاری تا شفاف اڈتننگ کن نگران سیٹ اپ نا مننگ المی ءِ۔ امن و ایمنی نا حالیت آتا رداٹ مستین اٹی ہم گچین کاری تا تاریخ ءِ بدل کننگانے۔ حکومت تکک کہ دا اہم انگا قومی باندات آ فل کورٹ فیصلہ تسکہ تو جوان مسکہ۔ اوپارے کہ بنجائی کابینہ سپریم کورٹ نا فیصلہ غا تینا گڑتی تا درشانی ءِ کرے۔ بنجائی کابینہ نا سلاہ ئسک کہ گیشتری فیصلہ ءِ اقلیتی فیصلہ ٹی بدل کننگپ۔ اوپارے کہ فل کورٹ جوڑ کننگتو تو ملک اٹی سیاسی و آئینی تنکی ترند مریک، عدالت اسہ ہم سیاسی جماعت اسے مقدمہ نا فریق جوڑ کتنے و نئے ہی موقف ءِ بِنگ۔ تحریک انصاف نا تعلقدار پٹیشن آ سپریم کورٹ آن فل کورٹ نا خواست کننگاسس ہرادے مسترد کننگا۔ اوپارے کہ گچین کاری تا باندات اٹی 184 تھری آ کوٹ آرڈر بس ہرادے اول سرکلر و ولدا 6 باسکی بنچ مسترد کرے، یکم مارچ آ فیصلہ بس تو ننا موقف ئسک کہ 3 نا مقابلہ ٹی 4 آن کیس خارج مس۔

(آن لائن/ اے پی پی)