مسجد اقصی ٹی اسرائیلی جارحیت نا مذمت ءِ کینہ، قومی اسمبلی

اسلام آباد: قومی اسمبلی عبادت کروک فلسطینی تیا مسجد اقصیٰ ٹی کوزہ گیر اسرائیلی فورس آتا تازہ بربریت نا برخلاف مذمتی قرارداد اس امنائی وڑاٹ منظور کرے۔ پنچ شنبے نادے آ ناز بلوچ ایوان اٹی رولز معطلی نا تحریک پیش کرے تانکہ قرارداد اس پیش کننگ مرے۔ ایوان نا منظوری آن پد اوقرارداد ءِ ایوان اٹ پیش کرے۔ ہراٹی پاننگاکہ دا ہاؤس اسرائیلی کوزہ گیر فوج آتا کنڈآن روچہ نا مقدس تُو اٹی مسجد اقصیٰ ٹی عبادت اٹی اختہ کودک فلسطینی ہرافتے ٹی زالبول و چناک ہم اوار ئسر، آ بربریت، درندگی نا مذمت ءِ کیک ہرا اقوام متحدہ نا قرارداد آتا سنگین خلاف ورزی ءِ۔ چنا و زالبول آتون اوار عباد ت اٹی اختہ فلسطینی تیا بربریت بنداوی انسانی حق انا بھلاخلاف ورزی ءِ، دا ایوان فلسطین نا الس تون پورو یکجہتی نا درشانیءِ کیک و خواست کیک کہ انسانی حق انا جہانی تنظیم و جہانی برادری خاموشی نا سکوت ءِ پرغے۔ اسرائیلی کوزہ گیر فورس آتا ظلم آن مچ آملک انا مسلمان تا جوزہ غاک مجروح مسنو۔ اسپیکر قراراداد ءِ ایوان اٹ منظوری کن پیش کرے ہرادے امنائی وڑاٹ منظور کننگا۔ داکان بیدس چین پاکستان اقتصادی راہداری (سی پیک) نایکم جولائی 2021آن 31 دسمبر 2021 نا میعادی رپورٹ ءِ قومی اسمبلی ٹی پیش کننگا۔ پنچ شنبے نادے آ کمیٹی نا چیئرمین نا کنڈآن سید طارق حسنین دا رپورٹ ءِ ایوان اٹ پیش کرے۔ ہندن قومی اسمبلی ٹی قائمہ کمیٹی انفارمیشن ٹیکنالوجی و ٹیلی مواصلات نا رپورٹ ءِ پیش کننگا۔ پنچ شنبے نادے آ قومی اسمبلی نا دیوان اٹی قائمہ کمیٹی انفارمیشن ٹیکنالوجی وٹیلی مواصلات نا چیئرمین نا کنڈآن مولانا عبدالاکبر چترالی یکم جولائی 2021 آن 31 دسمبر 2021 نا مد انارپورٹ ءِ ایوان اٹ پیش کرے۔ قومی اسمبلی ٹی قائمہ کمیٹی نجکاری نا رپورٹ ءِ پیش کننگا۔ پنچ شنبینادے آ قومی اسمبلی دیوان اٹی سید حسنین طارق قائمہ کمیٹی نجکاری نا چیئرمین نا کنڈآن یکم جنوری 2021آن 30 جون 2021 نا مد انا رپورٹ ءِ ایوان اٹ پیش کرے۔ قومی اسمبلی ٹی قائمہ کمیٹی نجکاری نا رپورٹ ءِ پیش کننگا۔ پنچ شنبے نادے آ قومی اسمبلی دیوان اٹی سید طارق حسنین قائمہ کمیٹی نجکاری نا چیئرمین نا کنڈآن یکم جولائی 2020آن 31 دسمبر 2020نا مدانا رپورٹ ءِ ایوان اٹ پیش کرے۔

(اے پی پی)