قومی اسمبلی،سپریم کورٹ نا فیصلہ نا برخلاف قرارداد منظور

اسلام آباد: قومی اسمبلی پنچ شنبے نا دے گیشتری اٹ اسہ قرار داد اس منظور کرینے ہراٹی پنجاب اٹ 14 مئی آ لس گچین کاری تے کرفنگ نابابت سپریم کورٹ نا 3 باسکی بنچ انا فیصلہ ءِ مسترد کننگانے‘قرار داد اٹ وزیراعظم و کابینہ ءِ پابند کننگانے کہ او آئین و کانود آن چَپ دا فیصلہ غا عمل کپ‘ قرار داد ءِ حکومتی سیوتی جماعت بلوچستان عوامی پارٹی نا پارلیمانی لیڈر خالد مگسی ایوان اٹ پیش کرے‘ دا وخت آ وزیراعظم میاں شہباز شریف ہم ساڑی ئس‘ قرار داد نا متن اٹ پاننگانے کہ دا ایوان 28 مارچ 2023 آ شرفمند ایوان نا منظور کروک قرارداد اٹ ازخودنوٹس کیس نمبر 1/2023 اٹ سپریم کورٹ نا چار جج آتا گیشتری فیصلہ نا مخ تفی ءِ کرسا داڑا عملدرآمد و بڑزکو عدلیہ غان سیاسی و انتظامی امور تے ٹی سٹی نیام تمپننگ نا خواست کریسس‘ گیشتری تپّہ غاک ہم فل کورٹ ٹہیفنگ نا خواست کریسر ولے دادے منظور کننگتو‘ نئے اسٹ آن بیدس ایلو سیاسی جماعت آتا موقف ءِ خف توننگا۔ پارلیمنٹ نا دا پیدوار قرارداد و سپریم کورٹ نا چار شرفمند جج آتا گیشتری فیصلہ ءِ پورو گوجالسا مسہ باسکی مخصوص بینچ اقلیتی سلاہ ءِ بیٹ کرے‘ ہرا سپریم کورٹ نا تینا جند اناروایت و وڑ وڈول انا خلاف ورزی ہم ارے‘ گیشتری آ اقلیت ءِ بیٹ کننگانے‘ مسہ باسکی اقلیتی بینچ انا فیصلہ ءِ پارلیمان مسترد کیک و آئین وکانود نا رداٹ گیشتری بینچ انا فیصلہ ءِ نافذالعمل گوندک‘ دا دیوان آئین پاکستان نا آرٹیکل 184 (3) نا رد اٹ دائر کروک مقدمہ غاتے فل کورٹ میٹنگ نافیصلہ غاتسکان سماعت کن پن کپننگ نا عدالت عظمی نا مسہ باسکی بینچ انا فیصلہ نا مخ تفی ءِ کیک و اسہ ایگزیکٹو سرکلر نا کمک اٹ داڑا عملدرآمد ءِ توننگ نا گام آگڑتی درشان کیک‘ دا ایوان ہمو عدالتی فیصلہ ءِ اشتاف اٹ اسہ پین و جھیڑہ ئی بینچ اسے نا مون آ سماعت کن پن کننگ و منہ منٹ اٹ داڑا دمدستی فیصلہ غا ہم گڑتی درشان کیک کہ دا وڑانا عمل سپریم کورٹ نا روایت و نظائر تیان برخلاف ءِ‘ ہندا سوب آن دا امنا کننگ مفک‘ دایوان سیاسی باندات آتے ٹی بے تک عدالتی نظام نا نیام تمنگ آ گڑتی درشان کیک‘ داسہ نا اقلیتی فیصلہ ملک اٹ سیاسی بے رکھی ودی کننگ اٹی ءِ۔ و بنجائی اکائی تے ٹی بشخ وبانٹ نا کسر ءِ ساف کننگانے‘ ہندا سوب آن دا ایوان ملک اٹ سیاسی و زرگزرانی سوگوی کن آئین وکانود اٹ نوشتہ وڑوڈول انا وڑ اٹ مچ آ ملک اٹ اسہ وخت آ لس گچین کاری کرفنگ ءِ کل ویل آتا ایسر سرپند مریک۔ دا ایوان مسہ باسکی بینچ انا اقلیتی فیصلہ ءِ مسترد کرسا وزیراعظم و کابینہ ءِ پابند کیک کہ آئین وکانود آن چَپ دا فیصلہ غا عمل کپ‘دا ایوان دستور نا آرٹیکل 63 اے انا غلط تشریح و دادے عدالت عظمی نا فیصلہ نا کمک اٹ اولسر نوشتہ کننگ آ گڑتی درشان کرسا خواست کیک کہ عدالت عظمی نا فل کورٹ دانا اولسر جاچ ءِ ہلے۔ قرارداد ءِ پیش کننگ آن پد اسپیکر راجہ پرویز اشرف دادے ایوان اٹ پیش کرے تو باسک آتا گیشتری دانا مخ تفی ءِ کرے و گیشتری سلاہ اٹ دا قرار داد ءِ منظور کننگا وخت اس کہ تحریک انصاف نا کنڈآن محسن لغاری قرارداد نا مخالفت ءِ کرے۔

(آن لائن)