پولیو تور مہم نا ارٹمیکو ریسہ 10 اپریل آن بلوچستان و خیبرپختونخوا ٹی بناکیک
اسلام آباد: پولیو تور نا پڑی کُنفنگ نا مہم نا ارٹ میکو ریسہ 10 اپریل آن بلوچستان نا 12 و خیبرپختونخوا نا 26 ضلع غاتیٹی بناکیک۔ پنچ دے ئی مہم اٹی ہڑتوم آ صوبہ غاتیٹی 4.12 ملین آن زیات چناتے پڑی کُنفنگک۔ بنجائی وزیر جان جوڑی عبدالقادر پٹیل لمہ و باوہ و خیال تخوک آ تیا زور شاغا کہ او داہیت ءِ پک کیر کہ اوفتا چناتے زند ءِ بچفوک آ پولیو ویکسین خلنگے تانکہ او پولیو دین آن رکھ مریر، ہرا چاگڑدی وڑتیٹی گردش کرسا خننگانے۔ تینا بیان اٹی اوپارے کہ چاگڑد اٹی وائلڈ پولیو نا ساڑی گری پاش کیک کہ دا دین ننا کمیونٹی ٹی پیری کُننگ اٹی ءِ و ننا چناتیکن بھلو خطرہ اسے۔ اوپارے کہ روچہ نا خڑک بننگ تون، آبادی نا ہن و بر پین تالان کننگ نا خطرہ ءِ ودفنگ کیک، ہنداسوب آن دا المی ءِ کہ لمہ و باوہ و خیال تخوک آک تینا چناتے دا مہم اٹی و ہر مہم اٹی ویکسین کرفر۔ برجاسال جنوری ٹی لاہور نا اِرا جتا جتا ہند آتیان مچ کروک آ سیوریج نا وڑتیٹی اولیکو وار وائلڈ پولیو دین نا معلوم مسوسس۔ اوکان پد آن پین اِرا وڑتیٹی پولیو نا ٹیسٹ مثبت بسنے۔ ڈی آئی آن جمع کروک آ وڑاٹی وائلڈ پولیو نا معلوم مسنے، گھوٹکی آن خان وچندی وڑنا پولیو دین نا سماتمانے۔ پولیو پروگرام گڑاس جاگہ غاتیا مروک آ مثبت چاگڑدی وڑتا رداٹ چناتے دا بیکچ متعدی ناجوڑی آن رکھ تخنگ کن اوفتا ویکسی نیشن ءِ پک کننگ کن غٹ تر کوشست آتے کرینے۔
(اے پی پی)