بلوچستان نا ورنا تے ٹیکنالوجی تون ہمگرنچ کننگ المی ءِ،عبدالعزیز عقیلی

کوئٹہ : چیف سیکرٹری بلوچستان عبدالعزیز عقیلی پارینے کہ بلوچستان بھاز اہمیت تخوک ءُ صوبہ اسے۔ ہراڑے ورنا تا آبادی ملک انا ایلو بشخ آتیان زیات ءِ۔ وخت اس کہ ہندا ورنا تے ساڑی ٹیکنالوجی آن معلومدار کننگ بھاز المی ءِ۔ تانکہ اوفتا فوکس درست جوان انگا کنڈ آ مرے۔ صوبہ نا 12.3 ملین آبادی ءِ۔ ہراڑے بھاز زیات ویل ارے۔ دا اڑاند آتے ایسر کننگ مچ آ ریجن کن المی ءِ۔ او پارینے کہ ٹیک ویلی پاکستان ءِ صوبائی حکومت کل المی کمک و مدت فراوان کیک تانکہ او زوت آن زوت اس تینا کاریم ءِ بنا کننگ کے۔ دا خیال آتا درشانی ءِ او حکومت بلوچستان و ٹیک ویلی پاکستان نا شریکی ٹی اڈ ہلوک دود آن تران کرسا کرے۔ او وخت آ حکومت بلوچستان و ٹیک ویلی پاکستان (Tech Valley) نا نیام اٹ اسہ مفاہمتی یاداشت اسے آ دستخط ہم کرے۔ دود اٹ چیف سیکرٹری بلوچستان عبدالعزیز عقیلی، سیکرٹری اطلاعات حمزہ شفقات، سیکرٹری ایس اینڈ جی اے ڈی بابر خان،سیکرٹری انفارمیشن ٹیکنالوجی طیب لہڑی، سیکرٹری کالجز حافظ عبد الماجد، سیکرٹری انڈسٹریز ٹیک ویلی پاکستان نا نمائندہ عمر فاروق و ایلو کمامدار آک بشخ ہلکر۔ داڑان بیدس ٹیک ویلی پاکستان نا نمائندہ عمر فاروق دیوان ءِ بریفنگ ترسا پارینے کہ ٹیک ویلی پاکستان بلوچستان نا 1000 ورنا تے 5 لکھ ڈالر کمک نا سکالر شپ نا وارخواہی فراوان کیک و گچین آ ورنا تے گوگل نا شریکی ٹی ٹریننگ فراوان کننگک۔ ورنا تے ٹریننگ نا پوروی آن پد گوگل کیرئیر سرٹیفیکیٹ اس درستگی کننگک وخت اس کہ ٹریننگ نا پوروی آن پد ہندا ورنا تے روزگار نا وارخواہی فراوانی مریک۔ او پارینے کہ ٹیک ویلی پاکستان نا ایلو صوبہ غاتیٹی تینا خدمت ءِ پیش کننگ اٹی ءِ۔

(خ ن)