کوئٹہ، سرکاری نرخ نامہ نا خلاف ورزی آ 29 ڈیری مالک دزگیر

کوئٹہ : ڈپٹی کمشنر کوئٹہ شہک بلوچ نا پارت و اُلسی غاو تا بابت ضلعی انتظامیہ ڈیری فارم آتا برخلاف بھلو کچ اسے ٹی کریک ڈاؤن کرسا سرکاری نرخ نامہ نا خلاف ورزی آ 29 ڈیری مالک آتے دزگیر کرسا جیل آ راہی کننگا۔ دا بابت اٹ اسسٹنٹ کمشنر سریاب نثار احمد لانگو نا زیر نگرانی چھاپہ مار ٹیم نا ڈیری فارم تا برخلاف بھلو کارروائی کرسا بھلو کچ اسے ٹی پک مروک آ نرخ آ بہا کننگ نا خلاف ورزی آ 14 بندغ آتے دزگیر کرسا جیل راہی کننگا۔ وخت اس کہ اسسٹنٹ کمشنر(سٹی) عطاء المنعم و اسسٹنٹ کمشنر(صدر) کیپٹن ر حسیب جتا جتا علاقہ غاتیٹی ڈیری فارم آتا برخلاف اواری ٹی کاروائی کرسا سرکاری نرخنامہ نا برخلاف و ناجائز منافع خوری کننگ آ 15 ڈیری مالک آتے دزگیر وخت اس کہ کیہی بندغ آتے ڈنڈ کرے۔ او وخت آ اسسٹنٹ کمشنر سریاب نثار احمد لانگو پارینے کہ ضلعی انتظامیہ ہڑدے نا بنداو آ پال انا دکان تا نگرانی برجا تخانے۔ ولدا ہم اوفتے آن سما تما کہ انتظامیہ ہرا ڈیری فارم آتے باہمی رضا مندی آن پد سرکاری نرخ 168روپئی فی لیٹر پال بہا کننگ نا موکل تسوسس اونا برخلاف گڑاس بندغ آک تینا نہاد آتیا پال بہا کننگ اٹی ءُ۔ ہرانا بنداو آ چھاپہ خلوک آ ٹیم ءِ تشکیل تننگا۔ ہراڑان ہندا کارروائی ءِ کاریم اٹ اتنگا۔ او مستی پارینے کہ انتظامیہ ہر وخت کاروباری آ بندغ آتے جوان ءُ چاگرڈ اس فراونا کننگ نا خواہندار مریک ولے او ہچ ءُ حالیت اسے ٹی دا ہیت ءِ سگپک کہ انتظامیہ و کاروباری آ بندغ آتا نیام اٹ اواری ٹی ہرا نہاد ءِ پک کننگے ولدا ہندا نہاد آتیا بہا نا جاگہ غا تینا من پسند و زیات نہاد آتیا بہا کننگے و اگہ کس اس دن کیک تو اونا برخلاف مقدمہ درج کرسا سخت سزا تننگک ہرا ایلوفتیکن مثال ثابت مریک۔

(خ ن)