سندھ انا وخت آ کروک گیج آتیان پاکستان بھلو بھسکاری سے آن بچا، بلاول

کراچی (مانیٹرنگ ڈیسک/ آن لائن) چیئرمین پیپلز پارٹی بلاول بھٹو زرداری پارینے کہ سندھ انا وخت آ کروک گیج آتیان پاکستان بھلو بھسکاری سے آن بچا، پاکستان پیپلزپارٹی نا سندھ حکومت ورلڈ ہیلتھ آرگنائزیشن نا گائیڈ لائن آتیا کاریم کننگ ءِ، بنجائی حکومت میڈیا ءِ شیف شاغنگ نا کوشست آتے بس کے، آجو صحافت کن صحافیک بھلو قربانی تسن،و ہم کوپہ سلوک اُن، دا ہیت آتے او اہم ءُ دیوان اسے آن وخت آ و تینا اسہ بیان اسے ٹی کرے۔ او پارے کہ پاکستان پیپلزپارٹی نا سندھ حکومت بیرہ ورلڈ ہیلتھ آرگنائزیشن نا کنڈ آن تروک گائیڈ لائن تیا کاریم کننگ اٹی ءِ۔ ہندا سوب ءِ کہ سندھ حکومت وخت آ گام گیج کرے و داڑان پاکستان ووہان، اٹلی و نیویارک جوڑ مننگ آن بچا۔ آسراتی تا مفننگ نا بابت بلاول بھٹو زرداری نا پاننگ ئس کہ بنجائی حکومت ڈاکٹر، نرس و پیرا میڈیکل اسٹاف ءِ ہچ ءُ آسراتی اس فراوان کتنے۔ بنجائی حکومت نا دا زمواری ءِ کہ او غٹ صوبہ غاتا کمک ءِ کے۔ بلال بھٹو پارے کہ لاک ڈاﺅن آن زہمی روزانہ کروک مخلوق کن ہم بنجائی حکومت داتم اسکان ہچ اس کتنے۔ چیئرمین پیپلزپارٹی پارے کہ الس نا زند ءِ رکھوک جوڑ کننگ ءِ اولیت ایتنہ۔ اسہ سازش اسے نا رد اٹ ننا خذمت نا جوزہ ءِ لتاڑ کننگ نا کوشست کننگ انگ ءِ۔ داکان بیدس پاکستان پیپلز پارٹی نا چیئرمین بلاول بھٹو زرداری پارینے کہ بنجائی حکومت میڈیا ءِ شیف شاغنگ نا کوشست آتے بس کے۔ چیئرمین پیپلزپارٹی بلاول بھٹو زرداری تینا جاری کروک آ بیان اٹی پارے کہ میڈیا ءِ شیف شاغنگ ان کوشست آک میڈیا ءِ تینا مخالف آتیا زوراکی کننگ کن اسہ ازباب اسے نا وڑ کاریم اٹ اتنگ کن ءِ۔ او پارے کہ پاکستان تحریک انصاف حکومت اٹی پریس نا آجوئی نا سال انا درجہ بندی ٹی شیفی بسنے۔ پاکستان اٹی صحافی تا صحافت نا آجوئی کن بھلو قربانی ءُ۔ و پیپلز پارٹی مدام صحافی برادری تون ہم کوپہ سلوک مسنے و داکان پد ہم سلک۔ او پارے کہ نن پریس نا آجوئی و بے کنڈ ہلوک صحافت کن جہد کرسا ہنانن۔ وخت اس کہ تحریک انصاف نا حکومت اولیکو دے آن میڈیا نا آجوئی آ جلہو کرسا ہنانے۔ و داسکان دا کاریمک تے برجا ءُ۔