زرگزرانی ٹیم انا وخت آ ہلہلہ ئی ایکشن پلان اس جوڑ کننگ ستا کڑزک، عمران خان

اسلام آباد (آن لائن) وزیراعظم عمران خان پارینے کہ کورونا نا برخلاف گچین حکمت عملی اٹ خلیس نا چاگڑد چٹنگ اٹی ءِ۔ زرگزرانی ٹیم وخت آ ہلہلہ ئی ایکشن پلان اس جوڑ کرے۔ یک شنبے نا دے وزیراعظم عمران خان پارلیمانی سلاہکار ڈاکٹر بابر اعوان اوڑدہی کرے، ہراٹی ملکی ساڑی حالیت، آئینی و کانودی باندات آتتون اوار کورونا وائرس نا رد اٹ السی ریلیف کن حکومتی فیصلہ غاتیا ہم ہیت و گپ کننگا۔ گڈ گورننس انتظامی باندات آتیٹی گچینی کن چندی باندات آتیا ہم سلابت کننگا۔ دا وخت آ وزیراعظم عمران خان پارے کہ کورونا کنٹرول کن کل وسیلہ غاتے کاریم اٹ اتنگ انگ ءِ۔ گچین حکمت عملی نا رد اٹ خلیس نا چاگڑد ءِ چٹفنگ انگ ءِ۔ غٹ آن بھلا چیلنج لس بندغ اسکان دمدستی ریلفی رسیفنگ ئس۔ زرگزرانی ٹیم انا وخت آ ہلہلہ ئی ایکشن پلان جوڑ کننگ خوشی نا ہیت اسے۔ ملک اٹی زرگزرانی عمل ءِ ترند کننگ کن بھلو گام گیج کننگ انگ ءِ۔ اوکان پد بابر اعوان میڈیا تون ہیت و گپ کرسا پارے کہ ملکی تاریخ اٹی اولیکو وار غریب دوست ریلیف پیکج اس تننگا۔ اپوزیشن جماعت آک بیرہ دوبہ نا سیاست کننگ اٹی ءُ۔ حکومت الس ءِ ریلیف تننگ کن ہر وڑ اٹ کمک کننگ اٹی ءِ۔ اوڑدہی ٹی پارلیمنٹ نا دیوان ءِ بٹنگ نا باندات ہم سلابت مس، بابر اعوان پارے کہ پارلیمنٹ نا دیوان ءِ بٹنگ آن مست رکھی گام گیج آتے پک کروئی تمک۔ دا بابت این ڈی ایم اے و این سی او سی تون حالی حوالی ارین۔ رکھی گام گیج آک است جمی نا سوب مسر تو کانود جوڑ کننگ نا عمل ءِ بیدس تل ول آن بنا کننگک۔