بنجا نا سندھ ءِ کورونا کمک بلاول نا بے سمائی نا پت ءِ پاش کرینے، شبلی فراز

اسلام آباد (مانیٹرنگ ڈیسک/آن لائن) بنجائی حوالکاری وزیر سینیٹر شبلی فراز چیئرمین پیپلز پارٹی بلاول بھٹو زرداری نا پریس کانفرنس نا رد عمل اٹی پارینے کہ کورونا نا مون ءِ توننگ کن سندھ ءِ تننگوک بنجا نا کمک بلاول نا بے سمائی نا پت ءِ پاش کننگ اٹی ءِ۔ بنجائی وزیر شبلی فراز پارینے کہ سندھ انا 45 ہزار صنعت و 7 لکھ 70 ہزار کمرشل صارف آتے بجلی نا بل آتیٹی ریلیف تننگا۔ داڑتون اوار یوٹیلیٹی اسٹور نا ریلیف ایلو صوبہ غاتیانبار سندھ ءِ ہم رسینگا۔ او پارے کہ اسٹیٹ بینک ڈیفرڈ اسکیم نا آسان وام سندھ اٹی ہم فراوان کننگانے۔ و اسٹ ٹِک اِرٹ کھرب نا کمکی پیکیج سندھ اتون اوار غٹ صوبہ غاتے ٹی بشخنگک۔ بنجائی وزیر نا پاننگ ئس کہ داکان بیدس سندھ اٹی 27 ارب روپئی احساس کیش ایمرجنسی پروگرام نا رد اٹ بشخنگانے۔ ماسک، رکھی سوٹ، ٹیسٹنگ کِٹ، تھرمل گن، سینیٹائزر و ایلو گڑا تے ہم سندھ ءِ تننگانے۔ شبلی فراز پارے کہ کورونا نا مون ئ، توننگ کن سندھ ءِ تننگوک بنجا نا کمک بلاول نا بے سمائی نا پت ءِ پاش کرینے۔ حوالکاری وزیر چیئرمین پیپلز پارٹی ءِ سلاہ تس کہ بلاول تینے سیاست اٹ زندہ تخنگ کن قومی سیوت و یکئی نا چاگڑد ءِ تار تار کپ۔ اپوزیشن سیاست نا جاگہ کورونا نا برخلاف جنگ اٹی وزیراعظم تون کمکار مرے۔ داکان بیدس بنجائی حوالکاری وزیر شبلی فراز پارے کہ تحریک انصاف نا حکومت آجو سلاہ درشانی نا بنداوی و آئینی حق آ پک باور کیک۔ راج انا شونداری ٹی میڈیا نا اہم ءُ کرد اسے۔ صحافت نا آجوئی نا دے آ حوالکاری و شینکاری وزیر شبلی فراز تینا ٹویٹر کلہو اٹی پارے کہ آجو و زموار صحافت نا شون تننگ کن غٹ گمانی آسراتی تے فراوان کرسا کانہ۔ زموار پریس راج انا شونداری ٹی اہم ءُ کڑد اس ادا کرینے۔ آجو سلاہ درشانی مہذب جمہوری راج انا بنچخ و انسان نا بنداوی حق ءِ۔ او صحافی برادری نا خذمت آتا امنائی ءِ کرسا پارے کہ آجو صحافت نا دے انا وخت آ قلم نا حرمت کن گیرام مفروک قربانی تروک صحافی تے خراج تحسین پیش کیوہ۔ شہدائے صحافت ءِ سلام ہرافک تینا دتر اٹ حریت فکر انا ڈیوا ءِ روشنا کریر۔