ودیک میرات کیس، نیب میاں شہباز شریف ءِ اینو بٹنگا

لاہور (آن لائن) قومی اسمبلی ٹی قائد حزب اختلاف و مسلم لیگ (ن) نا بنجائی صدر شہباز شریف ءِ قومی احتساب بیورو (نیب) کٹیا غان زیات میرات کیس اٹی پرسجو کن اینو دو شنبے نا دے بٹنگانے۔ شہباز شریف ءِ درکار دستاویز آتتون اوار دے انا 12 بجہ غا پیش مننگ نا پارت کننگانے۔ نیب انا کنڈ آن جاری مروک اعلامیہ ٹی پاننگانے کہ شہباز شریف جاست پاست اٹی قومی ادارہ غاتتون کمک کے و جند تے پیش مرے۔ یات سلے کہ شہباز شریف ءِ مہالو ہم اِرا وار بٹنگاسس، ولے او ملک اٹ مننگ آن پد ہم پیش متو، ولے او تینا نمائندہ غاتا کمک اٹ نیب ءِ دستاویز جمع کرفیسس۔ قومی احتساب بیورو شہباز شریف نا کنڈ آن راہی کروک ورندی آن است جم اف۔ دا وار نیب (ن) لیگ صدر ءِ پارت کرینے کہ او کانود نا رد اٹ تینٹ پیش مرے و درکار معلومداری تے فراوان کے۔ نیب انا پاننگ ئس کہ سال 1998ءآن سال 2018ءنا دے تیٹی فیملی نا میرات آتیان ود 549 ارب مس۔ پبلک آفس ہولڈر مننگ نا حیثیت اٹ دا میرات آتے ودکی نا سفائی ایتے۔ نیب سوج کرے کہ پیشن ملک ہراڑے ہراڑے میرات و بینک اکاﺅنٹ ساڑی اریر۔ دا سرجم آتے فراوان کننگے، سال 2005ءآن سال 2007ءنا نیام اٹ ہلنگوک وام تا سرجم آتے فراوان کے۔ شہباز شریف آن فیملی ءِ تننگوک و ہلنگوک غٹ ٹیکی تا سرجم آتے فراوان کننگے و سال 2008ءآن سال 2019ءنا نیام اٹ کشاری کٹیا نا سرجم آتے ہم ایتے۔