لاک ڈاﺅن نا سرسہبی مخلوق نا رویہ تون گنڈوک ءِ، چیف سیکرٹری

کوئٹہ (خ ن) چیف سیکرٹری بلوچستان کیپٹن (ر) فضیل اصغر پارینے کہ کورونا وائرس نا تالانی ءِ توننگ کن حکومتی گام گیج آتا سرسہبی مخلوق نا رویہ غاتتون گنڈوک ءِ۔ مخلوق لاک ڈاﺅن و راجی مری نا بابت بایدے سنجیدہ مرے۔ آخا تو دا دین بھاز بھلو گڑتی سے نا سوب مننگ کیک۔ او یک شنبے نا دے کورونا وائرس نا تالانی ءِ توننگ لاک ڈاﺅن و اونا بابت ایلو باندات آتا جاچ ءِ ہلنگ کن اڈ ہلوک بڑزکو کہولی دیوان نا کماشی ءِ کریکہ۔ او دا رد اٹ ایلو باندات آتا جاچ ءِ ہلنگ کن اسہ بڑزکو کہولی دیوان اسے نا کماشی ءِ کریکہ۔ او جانجوڑی سیکرٹری ءِ پارت کرے کہ جانجوڑی محکمہ نا کارندہ، خاص وڑ اٹ ڈاکٹر صاھب، نرس و پیرا میڈیکل اسٹاف ءِ ہر وڑ انا آسراتی و کورونا وائرس آن بچنگ کن غٹ رکھی وڑ و ڈَول، وائرس نا کٹ و ایلو گڑا تے فراوان کننگے۔ و اوفتے ہر وڑ اٹ رکھنگ آ چکار کننگے، انتئے کہ اوفک کورونا وائرس نا برخلاف فرنٹ لائن آ جنگ تننگ اٹی ءُ۔ اوفتا کاریمک ستا کڑزرہ۔ او دیوان نا ساڑی کمامدار آتیا زور شاغا و پارے کہ کورونا وائرس نا بابت نن تون راجی ڈیٹا نا مننگ بھاز المی ءِ۔ داڑان نئے بیرہ وائرس نا تالانی ٹی شیفی بڑزی تا سما تمک، بلکن داڑان حکومت ہرا کمکی پروگرام ءِ بنا کرینے، اوڑا عمل درآمد اٹی ہم آسانی مریک۔ بلوچستان یونیو رسٹی نا پر وفیسر ڈاکٹر وحید نور احمد ڈاکٹر ثناءاللہ پانیزئی بیوٹمز نا ڈاکٹر بختیار کاسی و ڈاکٹر عتیق اسک سائنسی بنداو آ جوڑ کروک ڈیٹا نا بابت بریفنگ ہم تسر، ہرانا چیف سیکرٹری ستا ءِ کرے و پارت کرے کہ داکان پد ہیلتھ ایڈ ورکر آتا دیوان اٹی دا ڈیٹا ءِ پیش کننگے تاکہ امنائی اٹ دا ڈیٹا ءِ تینائی کننگ مرے۔