لاک ڈاﺅن نا بے سہبی آن پد بلوچستان اٹ کرفیو خلنگے‘ ینگ ڈاکٹرز

کوئٹہ (آن لائن) ینگ ڈاکٹرز ایسوسی ایشن نا ترجمان ڈاکٹررحیم بابر پارینے کہ حکومت لاک ڈاﺅن اٹ بے سہبی آن پد بلوچستان اٹ کرفیو خلنگے‘ نہ تو کورونا ءِ توننگ مشکل مریک‘ کرفیوخلسا بلوچستان اٹ کورونا وائرس نا کیس تے پین ودنگ آن توننگ مریک‘ داناجوڑی ڈاکٹر آتا گڑتی تے ودفینے‘ اسکریننگ ناعمل سست ءِ‘ کورونا ٹیسٹ سفارش نا بنداو آ مننگ اٹی ءِ‘ حکومت دیہاڑی دار تپّہ نارکھ ءِ پک کننگ کن عملی گام گیج کے۔ دا خیال آتا درشانی ءِ او صحافی تتون ہیت وگپ کرسا کرے۔ ڈاکٹررحیم بابر پارے کہ بلوچستان اٹ کوروناوائرس نا کیس تاترندی اٹ ودنگ گڑتی نا سوب ءِ‘ ایلو صوبہ ٹی اسکریننگ نا عمل بھاز سست ءِ‘ بلوچستان اٹ ہڑدے بیرہ 3 سَدکورونا نا ٹیسٹ کننگ انگ ءِ ہراکہ بھاز کمءِ‘ سفارش نا بنداو آ ٹیسٹ مننگ حکومتی کارکڑد آ سوجی ٹک اسے‘ دا وخت اسکان بلوچستان اٹ 51ڈاکٹر، 35پیرامیڈیکل اسٹاف وخت اس کہ چار نرس کورونا غان زہمی ءُ، کورونا ٹیسٹ انا بابت حکومت بیرہ دعویٰ کننگ اٹی ءِ وخت اس کہ راستکیک داڑان اسُل چَپ ءُ‘ زہمی ڈاکٹر آتے آئسولیٹ کننگ کن ہچ ءُ بست وبند اس اف‘ ہرانا سوب آن بیوس مرسا او تینے اُراتے ٹی آئسولیٹ کرینو ہرانا سوب ڈاکٹر آتا اُرا والاک ہم کورونا وائرس آن زہمی مننگ اٹی ءُ‘ او پارے کہ نن خواست کریسن کہ ایم پی اے ہاسٹل ءِ خورک کننگے ہراڑے زہمی ڈاکٹر آتے آئسولیٹ کینہ ولے دا کنڈ آ ہچ چکار کننگتو ہرانا سوب آن ڈاکٹر آتا بھلو کچ اس زہمی مننگ اٹی ءِ۔