سعودی عرب کن سفری کانود آک پین سخت، کورونا ٹیسٹ منفی المی گوندنگا

ریاض (آن لائن) کورونا وائرس آن بچنگ نا گام گیج آتا رد اٹ سعودی عرب نا جنرل اتھارٹی ایوی ایشن ”گاکا“ لاک ڈاﺅن نا وخت آ سفر کروک کانود آتے پین سخت کرے۔ سعودی ایوی ایشن اتھارٹی نا کنڈآن جاری کروک ایس او پی نا رد اٹ پیشن ملک آن بروک ہر مسافر ءِ کورونا نا شکبر ناجوڑ تکنگ نا پارت کننگانے۔ کورونا نا منفی رپورٹ آن بیدس اسہ مسافر اس ہم سعودی جہاز اٹ سوار مننگ کپک۔اگہ مسافر اسے ٹی کورونا نا پاش ءُ نشانی مسر تو اودے جہاز اٹ آئیسولیٹ کننگک‘داکان بیدس غٹ مسافر آتیکن ہیلتھ ڈیکلیریشن فارم ہم المی گوندنگانے ہراڑے پاروئی مریک کہ مسافر وخت اس کورونا نا زہمی مسنے یا آخا‘ غٹ مسافر آک جہاز اٹ ماسک بینر‘عمل کپروک آتا برخلاف ائیرپورٹ آ کارروائی کننگک۔