ہجر انا زباد

نے خبر ہم ارے کہ اٹ وخت مننگ ءِ نے……؟

چار سال آن زیات……چار سال۔

چار سال تو ایہن با اٹ زو بریرہ ولے دافتے تدیفنگ نا کنے آن سوج کرک۔

نی سوج کپیسہ وا ہم ای پاوہ نے کہ کنے آ انت انت تدک۔

وا خیال بروءِ نے دا ہڑدے نا گپ آک ءُ، تو مرے ہڑدے نا گپ آک مریر…… ایہن ہم داسہ کس خف توپک دا گپ آتے کنا بیدس نے آن۔

نی ہم خف توننگ اُس یانہ؟

دانا ہم خبر تمنگ اف، ہیت نی کپیسہ ہراڑان کنے سما مرے کہ نی کنا ہیت آتے بننگ اُس…… ولے واہم ای خوش اُٹ کہ……

زرس چُپی گُل رنگ کاٹم ءِ تینا میز آ تخا…… دا چپی زرہ سے آن ودسا ہنا کس پاہے دا چپی زرہ سے آن بنا کیک و سال آتیان ودک کاہک ولے گُل رنگ نا آڑسندہ چُپی ءِ گٹو کرے…… اینو گُل رنگ تو ہیت آک تے تفنگ اَلوسہ۔ ہراوڑ کہ ہڑدے تران کریکہ، ولے واہم او اسہ وار ولدا بنا کرے تینا گپ آتے۔

ای خوش اُٹ یا نہ دانا کنے درک اف…… ولے ای نا مون آ ہیت اس کننگ کیوہ، ہندا کن کِن گنج اسے……

پین خوشیک کنے دوست ایہن داسہ بفسہ، دا زمان مخلوق کن برام آک خوشی نا چیرگیج ءُ، ولے ای داسہ برام آتیا اسُل ہنپرہ، انتئے کہ کنے برام آتیان ہمو ننا کنا اواری یات بریک، ہراڑان پد ای ونی مچ زند اکن اواری نا قول کرین…… ہرا عمر بھر اکن ہندن سلوءِ۔

گُل رنگ گُُد ءِ تینا گور آن مُر کرسا تینا زنچک آ اسیکا ہُرا وا پارے…… نے یات ءِ دا کنا ہمو پُچ آک ءُ، ہرانا زنچک نا پُھل ءِ نی تینا دنّان تیٹ کشکاس پاریس…… پُھل انا گور آ پُھل اس دا کنے قبول اف، ہموکان پد ای و نی اسہ مون جوان مخان۔

ای منہ دے مُست تینا کل پُچ آتا زنچک نا پھُل آتے کشکاٹ انتئے کہ دا پھُل آک نے دوست الوسہ۔

گُل رنگ پین ہیت جوڑ کننگ کِن سینٹ اس ڈبہ سے آن کشسا پارے…… نے یات ءِ دا ہمو سینٹ ءِ ہرادے نی کَن کِن مسافری سے آن بننگ نا وخت آ ایسُس ہندن کنے ہندا ہم پاریس کہ…… نی کنا گُل رنگ تو اریس ولے نے زباد اس ہم بکار ءِ…… ای ہراتم مسافری سے آن بسُٹ تو نی دادے ضرور خلیس کنے دانا زباد بھاز دوست بَس۔

گُل رنگ…… ہنداڑتون بے وڑ تینے آ سینٹ انا چٹکار کننگ نا بناءِ کرے ہرا وجد ہجر ءِ بیان کننگ ئس، ساہت اس تو ہندن لگاکہ کہ او سینٹ ءِ چٹفو ءِ، ولے داٹی ہم صبر ئس شاغا و ولدا ہیت ءِ بنا کرے۔

اینو ہم کنے نا بننگ نا گمان ءِ…… دا ہر وخت نا وڑ انا گمان اس اف داجار کنے یقین ءِ نی آخبتی بریسہ…… نی پاروس نے امر یقین ءِ۔

نی تو کنے دا زباد نا پاریسس کہ نے دوست ءِ مسافری سے آن بسُٹ تو ہندادے خلیس…… ہندن نی کیہی وار حیران ہم مسسہ کہ امر نے خبر مس کنا بننگ نا کہ اینو ہندا سینٹ ءِ خلکُنس…… ای بشخندہ اٹ نے پاریٹہ کہ ایہن اینو گمان ہرفے کنے کہ نی بریسہ۔

ولے حقیقت دادے کہ ای نا زہیری نا، مہر انا، دیدار نا زباد آن نا بننگ ءِ محسوس کریٹہ، نا بننگ آن مُست اینو ہم کنے آہمو زباد بننگ ءِ دا تہو انا چرک آتیٹ…… داکن تون دن ءُ مسخرہ تو کننگ کپسہ انتئے کہ ای جوان چاوہ نا زباد ءِ اینو تو نی بریسہ……ضرور بریسہ۔

گل رنگ ……او گُل رنگ 

گل رنگ نا تاتہ گُٹ اناپُر اٹ توار خلنگ ئس 

گل رنگ نا اُرا ہُشنگا ……نا سیخا پُلنگا

ہندا گپ اتون اوار

گُل رنگ……

زباد نا شیشہ……

ہمو عکس وعکس بند ہرافتتون او ہڑدے گپ کریکہ……

فرش آ بے ساہ، شیشپہ شیشپہ، ہجر انا زباد اٹ تالان مسُر۔

ہفتئی تلار

تاک: 36

19-25 September 2020

پنہ، 5