شناختی کارڈ و پاسپورٹ دوئی کننگ ءِ آسان کننگے،و زیرا عظم

اسلام آباد : وزیراعظم محمد شہباز شریف شاری تیکن شناختی کارڈ و پاسپورٹ نا دوئی کننگ اٹ آسانی ودی کرسا پارینے کہ کفایت شعاری وبچت کن نادرا و ڈائریکٹریٹ جنرل آف امیگریشن آف پاسپورٹ دفتر و وسیلہ غاتے شیئر کیر تانکہ قومی خزانہ غا کم باریم تمے۔ وزیراعظم آفس نا میڈیا ونگ انا کنڈآن چارشنبے نادے آ جاری بیان نا رداٹ وزیراعظم نا کماشی ٹی شاری تیکن شناختی کارڈ و پاسپورٹ نا دوئی کننگ اٹ آسانی ودی کننگ نا بابت دیوان اس اڈہلک۔ دیوان اٹی بنجائی وزیر خزانہ و محصولات سینیٹر اسحاق ڈار، بنجائی وزیر داخلہ رانا ثناء اللہ، بنجائی وزیر تعلیم رانا تنویر حسین، چیئرمین نادرا، ڈائریکٹریٹ جنرل امیگریشن اینڈ پاسپورٹس و تعلقدار بڑزکو سرکاری آفیسر آک بشخ ہلکر۔ وزیراعظم پارت کرے کہ شاری تیکن شناختی کارڈ و پاسپورٹ نا دوئی کننگ اٹ آسانی ودی کننگے، نادرا نا ہند آتیٹی پاسپورٹ دفتر نا کاؤنٹرز جوڑ کننگے و کفایت شعاری و بچت ءِ مون آ تخسا نادرا و ڈائریکٹوریٹ جنرل آف امیگریشن اینڈ پاسپورٹس دفتر نا جاگہ و وسیلہ غاتے شیئر کیر تانکہ قومی خزانہ غا کم بھاریم تمے۔ وزیراعظم شاری تے شناختی کارڈ نا سروس اوفتا درگہ غا مہیا کننگ کن موبائل نادرا وینز آتا کچ ءِ دمدستی ودفنگ نا پرمان ہم تس۔ دیوان اٹی وزیراعظم ءِ تروک آ حوال اٹی پاننگاکہ شاری تے اُراٹی تولوک شناختی کارڈ انا پوسکنی نا آسراتی کن نادرا پوسکن آ موبائل فون ایپلی کیشن اس بناکننگ ءِ۔ دیوان اٹی بشخ ہلوک آتون گپ وتران کرسا وزیراعظم پارے کہ شناختی کارڈ و پاسپورٹ نا دوئی کننگ ہر شاری نا بنداوی حق ءِ۔ اوتاکید کرے کہ لس شاری تے اوفتا اُرانا درگہ غا شناختی کارڈ و پاسپورٹ نا فراوانی نا بابت گام گیج آتیٹی پین گچینی اتنگے و دا پک کننگے کہ ہر شاری ءِ دا بابت اسہ وڑ آسراتی دُوبرے۔ وزیراعظم پرمان کرے کہ پاسپورٹ دفترآتا جوڑ کننگ نا اخس ہم ڈٹ منظور مسنے او نادرا نا مہالو آن ساڑی دفترآتیٹی جوڑ مریر۔ دیوان ءِ پاننگاکہ صارف آتا آسراتی کن نادرا اسہ پوسکن ءُ موبائل فون ایپلی کیشن اس بناکننگ والا ءِ ہرانا کمک اٹ اُراٹی تولوک شناختی کارڈ انا تجدید مننگ کیک۔ داکان بیدس وزیراعظم محمد شہباز شریف اسلام آباد نا سرکاری ماڑی تیٹی بروک آ 7 ہفتہ ٹی سولر سسٹم خلنگ نا پارت کرسا دانا دنگ ءِ مچ آملک اٹی بنجائی سرکاری ماڑی تسکان ودفنگ نا پرمان کرینے وخت اس کہ وزیراعظم پارے کہ حکومت کم خڑچ و چاگڑد دوست بجلی آن الس نا جیب آ بھاریم کم کننگ نا کوشست کننگ ءِ۔ وزیراعظم آفس نا میڈیا ونگ انا کنڈآن جاری بیان نا رداٹ چارشنبے نادے آ وزیراعظم محمد شہباز شریف مچ آملک اٹی سرکاری ماڑی تا سولر ائزیشن آ پیش رفت نا جاچ دیوان نا کماشی ءِ کرے۔ دیوان ءِ پاننگاکہ اسلام آباد اٹی 496، ملک انا بھلا شار بشمول کراچی، لاہور، فیصل آباد کوئٹہ ٹی 340 و ایلوعلاقہ غاتیٹی 1255 سرکاری ماڑی تیا سولر پینل خلنگک۔ دیوان ءِ پاننگاکہ اسلام آباد اٹی ساڑی سرکاری ماڑی تیٹی سولر پینل آتا خلنگ نا کاریم ءِ ہلہلہ ئی بنداو تیا کننگک۔ دیوان اٹی مسکوہی وزیراعظم شاہد خاقان عباسی، بنجائی وزیر، خواجہ محمد آصف، اسحاق ڈار، سلاہکار وزیراعظم احد خان چیمہ، خصوصی کمکار جہانزیب خان و تعلقدار بڑزکو کمامدارآک بشخ ہلکر۔ وزیراعظم شہباز شریف سولرائزیشن ڈٹ انا بابت بھلو فیصلہ اس کرسا اسلام آباد نا سرکاری ماڑی تیٹی بروک آ 7 ہفتہ ٹی سولر سسٹم خلنگ نا پارت کرے۔ وزیراعظم تعلقدار کمامدارآتے ڈٹ ءِمعینہ مد اٹ پورو کننگ نا پیدوار پارت کرساپارے کہ او درآمدی ایندھن آ سیبو ءِ کم کننگ کن گام گیج آتا نفاذ اٹی تعطل ءِ سگپنہ۔ وزیراعظم پارت کرے کہ ایلو ملک اٹی سرکاری ماڑی تا سولرائزیشن آ کاریم نا دمدستی وڑاٹ بناءِ کننگے۔ اوپارے کہ حکومت کم خڑچ و چاگڑد دوست بجلی آن الس نا جیب آ بھاریم ءِ کم کننگ نا کوشست کننگ اٹی ءِ۔

(اے پی پی)