ڈبلیو ایچ او ڈائریکٹر نا ترکیہ نا دورہ، زہمی علاقہ و فیلڈ ہسپتال آتے ہُرا

انقرہ /اسلام آباد :  جہانی ادارہ جان جوڑی نا ڈائریکٹر جنرل ٹیڈروس ایڈہینم گبریسس ترکیہ نا زمی جمب آن زہمی علاقہ غاتیٹی فیلڈ ہسپتال و خیمہ بستی تا دورہ ءِ کرے۔ ترک خبررساں ادارہ نا رداٹ جہانی ادارہ جان جوڑی نا سروک ترکیہ نا زمی جمب آن زہمی علاقہ غاتیٹی فیلڈ ہسپتال و خیمہ بستی تا دورہ ءِ کرسا کمامدارآتیان معلومداری دوئی کرے۔ اوضلع حطائے ٹی بلجیم نا فیلڈ ہسپتال نا دورہ ءِ کرے و جان جوڑی نا عملہ تون اوڑدہی ٹی گپ وتران کرسا پارے کہ ترکیہ نا قومی میڈیکل ریسکیو ٹیم (یو ایم کے ای) نا خڑکی کمکاری کنا است ءِ پلانے، داکان بیدس ترکیہ و شام انا زمی جمب آن زہمی تیکن این ڈی ایم اے و پاکستان نا فوج انا خصوصی کوشست آک برجاءُ۔ پاک بحریہ نا جہاز ”نصر“ اسہ ہزار ٹن آن زیات کمکی گڑا ہرفسا ترکیہ کن روانہ مس۔ آفیشل کمامدارآتا رداٹ کمکی جہا ز انا روانگی نا وخت آ ترکیہ نا قونصل جنرل جمال سنگو و پاک بحریہ نا بڑزکو سرکڑدہ غاک بشخ ہلکر۔ ہڑتوم آ زہمی ملک آتیکن مون تروک آ کمکی گڑاتے ٹی ہزار آتا کچ اٹی یخ انا موسم آن بچفنگ کن تمبو، کمبل، بارُن ءُ راشن، دوائی، گیشر لویس و بھلو کچ اسے ٹی جنریٹر آک اوار ءُ۔ پاک بحریہ نا کمکی کھیپ ءِ دروک آ ”نصر جہاز“ چانڑدہ دے انا بحری سفر آن پد تینا مقررہ مزل ءِ طے کیک۔ پاکستان نا فوج و این ڈی ایم اے نا اسیجائی کوشست آتا مہالو آن ہی ترکیہ و شام انا الس معترف مسنو ہرانا کساس ءِ جہانی میڈیا نا پذیرائی آن خلنگ مریک۔ ترکیہ و شام انا زمی جمب آن زہمی تیکن پاکستان نا فوج و این ڈی ایم اے نا کمکی کوشست آک پورو بحالی اسکان برجاسلرہ۔

(اے پی پی)