صدر آئین نا خلاف ورزی ءِ کرے، گورنر کتنے،اعظم نذیر تارڑ

اسلام آباد : بنجائی وزیر کانود اعظم نذیر تارڑ پارینے کہ نن تو پانہ دا پٹیشن مسٹ نا مون اٹ چار اٹ مسترد مسنے‘ فیصلہ نا اولسر جاچ ہلنگ نا ہچ گرج اف، صدر عارف علوی آئین نا خلاف ورزی کرینے‘ گورنر کتنے۔ اسلام آباد اٹ اٹارنی جنرل آف پاکستان شہزاد الہیٰ تون اوار پنجاب و خیبرپختونخوا ٹی گچین کاری تابابت سپریم کورٹ نا فیصلہ غا ردعمل ترسا وزیرکانودپارے کہ بایدے آئین وکانود نا ہیت کننگے وکیل اس تاریخ خواتنے‘ فیصلہ غا اولسر جاچ ہلنگ نا گرج نئے دا تشریح خواہوک باندات اسے‘ نن تو پانہ کہ دا پٹیشن مسٹ نا مون اٹ چار جج مسترد کرینو۔ 23فروری آ 2جج پاریر کہ دا سماعت مننگ کپک‘ ہڑتوم آ ہائی کورٹ آتے ٹی درخواست آک اریر فیصلہ نا تشریح ہموڑے ہم مننگ کیک۔ او پارے کہ فیصلہ بھاز پیدوار ءِ و اوٹی ڈکوک ہچ گڑاس اف‘ دا کٹنگ باہ تننگ‘ لائخی و نابودی نا کیس اس الو‘ کس اس گچین کاری تیان نرپننگ ءِ‘ تاریخ تے ٹی ردوبدل مننگ کیک‘ گچین کاری تا تاریخ و مننگ مدام آئین وکانود نا رد اٹ مرسا کرینو‘ گچین کاری تا فیصلہ ءِ الیکشن کمیشن ءِ کروئی ءِ‘ وزیر کانود پارے کہ صدر مملکت فیصلہ کرسا ولدا پدی ہلک تے‘ صدرنا وکیل عدالت اٹ دا ہیت ءِ امنا کرینے کہ صدر واکداری تیان جپانے‘ آئین نا خلاف ورزی ءِ گورنر کتنے صدر مملکت کرینے۔ او پارے کہ فیصلہ غاک آئین وکانود نا رد اٹ مریرہ پارٹی تا صدر کننگ کپک۔او پارے کہ 5سال آن شرہ مننگ اٹی ءِ کہ مردم شماری بایدے ڈیجیٹل مرے۔ ڈیجیٹل مردم شماری نا نتیجہ 30اپریل اسکان بریک‘ حلقہ بندیک شیف بڑز اریر۔ مسہ جج پاریر کہ دا پٹیشن نا سماعت مننگ کپک۔ گورنر و الیکشن کمیشن سلاہ اٹ تاریخ ایتر‘ 90 دے تو گدرینگک ولے سلابت آن پد اخس زو مننگ کے گچین کاری تے کرفنگے۔ او پارے کہ داٹی پین ہیت اف‘ نن ہم ہندا خوانہ کہ حالیت آک جوان مریر ولدا ہم آئین گچین کاری اڈ تننگ نا حق ءِ الیکشن کمیشن وایلو اسٹیک ہولڈر آتے ایتک۔

(آن لائن)