سینیٹ غٹ صوبہ غاتے بریبر نمائندگی فراوان کیک، صادق سنجرانی

اسلام آباد :  چیئرمین سینیٹ محمد صادق سنجرانی پارینے کہ سینیٹ غٹ صوبہ غاتے بریبر نمائندگی فراوان کیک، سینیٹ پسماندہ علاقہ غاتے شونداری نا دنگ اٹ اتنگ کن کوشست کننگ اٹی ءِ۔ داخیال آتا درشانی ءِ او گورنر خیبرپختونخوا حاجی غلام علی تون گپ وتران کرسا کرے ہرا چارشنبے نادے آ داڑے اوڑتون اوڑدہی کرے۔ اوڑدہی ٹی صوبہ خیبرپختونخوا نا شونداری، السی راجی آسراتی نا گام گیج آتون اوار ایلو امور آ گپ وتران کننگا۔ چیئرمین سینیٹ صوبہ نا شونداری عمل ءِ ترند کننگ نا چرجوئی ٹی رابطہ کاری ءِ پین گچین کننگ نا گرج آ زور شاغا۔ چیئرمین سینیٹ صوبائی ہم آہنگی ءِمون آ دننگ نا بابت سینیٹ نا کڑد ءِ ہم مون آ تخا۔ اوڑدہی ٹی چیئرمین سینیٹ پارے کہ سینیٹ اسہ ہندن ءُ فورم اسے ہرا غٹ صوبہ غاتے بریبر نمائندگی فراوان کیک۔ سینیٹ پسماندہ علاقہ غاتے شونداری نا دنگ اٹ اتنگ کن کوشست کننگ اٹی ءِ۔ چیئرمین سینیٹ گورنر ءِ سینیٹ نا گولڈن جوبلی نا بابت بست وبند آتیاہم معلومدار کرے۔ محمد صادق سنجرانی پارے کہ ملک انا زرگزرانی حالیت آتے ہرسا دا فیصلہ کرینن کہ گولڈن جوبلی ءِ سادہ و پروقار وڑاٹ اڈتننگے۔ سینیٹ نا گولڈن جوبلی اسہ تاریخی موقع اسے و دا ننے قومی یکجہتی نا مون آ دننگ نا اہمیت ءِ تالان کننگ اٹ کمکار مریک۔ گورنر خیبرپختونخوا چیئرمین سینیٹ نا منت واری ءِ ہرفسا کمکاری و رابطہ کاری آ زور شاغا۔ حاجی غلام علی پارے کہ بنجانا کمک اٹ مچ آ صوبہ خاص وڑاٹ ضم ضلع غاتیٹی شونداری ڈٹ و الس نا زند انا آب ءِ گچین کننگ کن گام گیج کننگ انگ ءِ۔

(اے پی پی)