ای و مُرید۔۔۔۔ (افسانہ)

دنیا نا رنگ اتون پند خلسا دے اس پیرس نا نقشہ، دے اس ایران نا سیل سوات، دے اس مصر انا زیبائی، دے اس عرب نا ریک آک، دے اس اوغان نا جنگ، دے اس روس انا نزوری، دے اس چین انا دیوال، دے اس ہند انا دِلی۔۔۔۔۔۔

کِسہ تون مشغول دے پہ دے رنگ آک کنا تہٹی مین ہلنگ ئسر۔

جاگہ اس ناول اسے تون اختہ آنلی آ داستان تون شے اکن پراد کننگ۔

جاگہ اس خلقی رنگ آتتون سر ہلنگ۔

تینا ڈیہہ انا رنگ آتیان بے سما گام خلنگ اٹی امریکہ نا بلڈنگ آتا کچ ءُ سوچ۔۔۔۔

تینے گُم گار کریسٹ کہ کنے ہم اسہ خاک اس ارے، ہرانا سربُن شام فلسطین عراق سوریا نا ظلم دڑد آتتون بنا مریک۔

تینے پُہہ متوٹہ کہ ای ہم ہمو خاک اُٹ، ہراٹی لمہ غاتا کوک پراد آک دنیا ٹی آسڑد نا وڑ تالان مننگ اٹی ءُ۔۔۔۔۔۔

تینا ذات ءِ گیرام کریسٹ کہ ای ہمو پاک آ قوم آن تعلق تخوہ۔

ہرا اسہ تاس دیر اکن سد سال وفاداری نا سند ءِ دوئی کرینو۔

تینا بولان تینا آماچ ءِ دُرست کتوٹہ کہ ہرا کنا ڈیہہ انا کُل باریم ءِ تینا کوپہ غاتیا بڈ کرینو چریفرہ تے۔

اسہ دے دُن مس کہ

بُڑز انگا جوزہ تون مش تا تلار آتا نیام آن…. بولان نا دیر اٹ چلتن نا دامان اٹ راسکوہ نا گور آن، آمون نا مُرغُنی ٹی گاؤ کوہ نا کیرغ آن…. کنا دوٹی اسہ مُرید اس ہلک…. کنے کُل رنگ آتیان کشا….

کنے تینا وجود ءِ نشان تس۔

کنے کنا ذات ءِ پہہ کرے۔

کنے تینا خاک اتون وفاداری نا کِسہ غاتے بنفے۔

کنے آماچ نا سپاہی تا پارے۔

راسکوہ نا دڑد آتے نشان ترسا

کنا خن تے تفے ولدا مَلا۔۔۔

ہفتئی تلار

تاک: 21

P# 07

30 May- 05 June 2020