کل بشخ آتیٹی اصلاحات نا بناءِ کننگانے، سینیٹر اسحاق ڈار

اسلام آباد: بنجائی وزیر خزانہ سینیٹر اسحاق ڈار پارینے کہ پاکستان آئی ایم ایف تون پروگرام ءِ پورو کننگ اٹ سنبرینگوک ءِ، 9 می جاچ انا پوروی کن آئی ایم ایف نا مشن تون پورو کمک کننگک، حکومت بجلی و گیس اتون اوار زرگزران نا چندی بشخ آتیٹی اصلاحات نا چرجوئی نا بناءِ کرینے۔ اوداہیت ءِ سے شنبے نادے آ داڑے جہانی مالیاتی فنڈ انا جاچ مشن اتون اوڑدہی ٹی پارے۔ آئی ایم ایف نا ڈل انا کماشی ءِ آئی ایم ایف نا مشن چیف نتھن پورٹر کریکہ۔ داوخت آ آئی ایم ایف نا ریذیڈنٹ نمائندہ ایستر فیرس روئیس، وزیر مملکت خزانہ ومحصولات عائشہ غوث بخش، خصوصی کمکار طارق باجوہ، خصوصی کمکار محصولات طارق محمود پاشا، گورنر اسٹیٹ بینک جمیل احمد، سیکرٹری خزانہ، چیئرمین ایف بی آر، آئی ایم ایف ڈل انا باسک آک و وزارت خزانہ نا سینئر آفیسر آک ہم ساڑی ئسر۔ دیوان اٹی آئی ایم ایف نا ودکی فنڈ آسراتی (ای ایف سی) نا رداٹ 9 می جاچ اکن پاکستان نا زرگزران و مالیاتی و اصلاحاتی ایجنڈا نا جاچ ءِ ہلنگا۔ وزیرخزانہ آئی ایم ایف نا ڈل ءِ بخیر کرے و پاکستان و آئی ایم ایف نا نیام اٹ دوستانہ تعلقداری تے مون آ تخا۔ وزیرخزانہ مالیاتی خلیج ءِ کم کننگ، ایکسچینج ریٹ انا سوگوی و زرگزران نا گچینی کن توانائی نا بشخ اتون اوار قومی زرگزران نا چندی بشخ آتیٹی اصلاحات کن حکومت نا کنڈان کروک آ گام گیج آتیان ڈل ءِ معلومدار کرے۔ وزیرخزانہ پارے کہ حکومت بجلی نا بشخ اٹی ہم اصلاحات آتا چرجوئی نا بناءِ کرینے و بجلی و گیس انا بشخ اٹی گردشی وام تا چٹفنگ کن اسہ کمیٹی اس جوڑ کننگانے ہرا دا بابت وڑوڈول اس جوڑ کیک۔

(اے پی پی)