آئی ایم ایف نا خواست آتے پورو کننگک، پاکستان

اسلام آباد: حکومت آئی ایم ایف پروگرام ءِ گچین وڑ اٹ وخت آ پورو کننگ کن جہانی مالیاتی فنڈ انا شڑت آتے پورو کننگ نا باور کرفینے‘ وخت اس کہ آئی ایم ایف و پاکستان مالیاتی اصلاحات آ اسیجائی اٹ کاریم کننگ آ امنائی کرینو‘ پیری کروک وام تا خطرہ تون مون تننگ کن وڑوڈول پیدوار کننگ کن کمیٹی ٹہیفنگا۔ وزارتِ خزانہ ناکنڈآن جاری کروک اعلامیہ نا رد اٹ بنجائی وزیر خزانہ اسحاق ڈار فنانس ڈویژن اٹ آئی ایم ایف مشن نا چیف نیتھن پورٹر ناکماشی ٹی آئی ایم ایف نا جاچ مشن تون اوڑدہی کرے‘ ہراٹی وزیر خزانہ باور کرفے کہ پاور سیکٹر اٹ اصلاحات اتنگ انگ ءِ و گیس سیکٹر اٹ پیری کروک وام تا خطرہ تون مون تننگ کن وڑوڈول پیدوار کننگ کن اسہ بڑزکو کہولی کمیٹی اس ٹہیفنگانے۔ داوخت آ آئی ایم ایف نا ریذیڈنٹ نمائندہ ایستھر پیریز روئیز، وزیر مملکت خزانہ و محصولات ڈاکٹر عائشہ غوث پاشا، ایس اے پی ایم خزانہ طارق باجوہ، ایس اے پی ایم آن ریونیو طارق محمود پاشا، گورنر اسٹیٹ بینک جمیل احمد، سیکرٹری خزانہ، چیئرمین ایف بی آر، آئی ایم ایف ڈل انا باسک و فنانس ڈویژن نا سینئر افسر آک ساڑی ئسر۔ دیوان اٹ توسیعی فنڈ آسراتی نا رد اٹ 9 می جاچ ءِ پورو کننگ کن اقتصادی و مالیاتی پالیسی و اصلاحاتی ایجنڈا غا ہیت وگپ کننگ تون اوار جم جاچ ہلنگا۔ وزیر خزانہ سینیٹر اسحاق ڈار ڈل ءِ بخیر کرے و آئی ایم ایف تون سوگو سنگتی آ ساڑی تعلقداری تا درشانی ءِ کرے۔او مشن ءِ مالیاتی و اقتصادی اصلاحات و چندی بشخ آتے ٹی حکومت ناکنڈآن کروک گام گیج مالیاتی فرق ءِ کم کننگ‘ زرمبادلہ ءِ سوگو کننگ و زرگزران نا گچینی کن توانائی نابشخ اٹ کروک گام گیج آتیان آگاہ کرے۔ وزیر خزانہ ہیت وگپ ءِ برجا تخنگ آ آئی ایم ایف نا منیجنگ ڈائریکٹر نا منت ءِ ہرفے‘وزیرخزانہ پارے کہ وزیرخزانہ نا وڑ اٹ ای داکان مست ہم آئی ایم ایف پروگرام ءِ سرسہبی اٹ پورو کرینٹ‘او باور کرفے کہ حکومت ساڑی پروگرام ءِ ہم پورو کننگ کن پرعزم ءِ‘ اسحق ڈار مشن کن تینا مخ ءِ پین ودفنگ و توسیعی فنڈ آسراتی (ای ایف ایف) نا رد اٹ 9 می جاچ ءِ پورو کننگ کن اسہ معاہدہ اسسکان سر مننگ کن اسیجائی اٹ کاریم کننگ نا قول کرے۔ آئی ایم ایف نا مشن چیف مسٹر نیتھن پورٹر دا وخت آ اومیت درشان کرے کہ حکومت 9می جاچ انا پورو کننگ کن آئی ایم ایف نا خواست آتے پورو کیک و اومیت درشان کرے کہ پاکستان چندی بشخ آتے ٹی اصلاحات آ تینا پیش رفت ءِ برجا تخنگ تون اوار آئی ایم ایف پروگرام ءِ گچین وڑ اٹ وخت آ پورو کیک۔ او پارے کہ آئی ایم ایف و پاکستان مالیاتی اصلاحات آ اسیجائی اٹ کاریم کیرہ۔

(آن لائن)