بلوچستان اسمبلی، قرآن پاک بے شرفی، پشاور دھماکہ نا مذمت
سویڈن اتی نسل پرست و انتہاء پسند آک ننا مقدس کتاب نا بے شرفی ءِ کننگ نا گیگ کریر، دانا اخس کہ مذمت ءِ کننگے کم ءِ
کوئٹہ : بلوچستان اسمبلی نا دیوان اٹ سویڈن اٹ قرآن پاک نا بے حرمتی و پشاور اٹ مسیت اٹ خودکش جلہو نا بابت اصغر ترین، خلیل جارج ناکنڈآن جتا جتا پیش کروک مذمتی قرارداد آتے امنائی اٹ منظور کننگا۔ بلوچستان اسمبلی سرکاری گاڈی تے ایلو صوبہ غاتے چلیفنگ آ چیف سیکرٹری بلوچستان عبدالعزیز عقیلی ءِ پنچ شنبے نا دے دوانزدہ بجہ غا بلوچستان اسمبلی ٹی پیش مننگ نا رولنگ تس‘وخت اس کہ نصراللہ زیرے ناکنڈآن چشمہ اچوزئی ٹی قبیلہ غاتا ڈغار تے کوزہ کننگ نابابت قائمقام اسپیکر سینئر بورڈ آف ریونیو ءِ ہم پنچ شنبے نادے بلوچستان اسمبلی ٹی پیش مننگ نا رولنگ تس‘ بلوچستان اسمبلی نا دیوان سَے شنبے نادے قائمقام اسپیکر سردار بابر موسیٰ خیل ناکماشی ٹی بنا کرے‘ دیوان اٹ پینل آف چیئرمین کن قادر نائل، اصغرترین، اصغر خان اچکزئی، شکیلہ نوید دہوار ءِ پن کننگا۔ صوبائی وزیر نعیم بازئی ناکنڈآن سانحہ بیلہ، پشاور و کوہاٹ اٹ شہید مروک آتیکن دعا پاتیہ نا خواست کننگا تو اسپیکر کل شہید آتیکن دعاپاتیہ کرفے۔ بلوچستان اسمبلی نا دیوان اٹ جمعیت علماء اسلام نا صوبائی اسمبلی نا باسک اصغر ترین مذمتی قرار داد پیش کرسا پارے کہ منہ دے مست سویڈن اٹ نسل پرست و انتہا پسندآتا کنڈآن ننا مقدس کتاب قرآن پاک نا بے حرمتی کننگ نا گندہ انگا فعل انا مذمت ءِ کیوہ‘ دا وڑ انا حرکت آن مچ آدنیا نا مسلمان تا است آزاری مسنے وداڑان دنیا ناکل مسلمان‘ مذہب انسانیت ءِ ارمان مسنے‘ دابھلا ڈوہ بین المذاہب ہم آہنگی راجی امن و مذہبی رواداری ءِ نسخان رسیفنگ نا کوشست اسے‘ہندا سوب آن دا ایوان صوبائی حکومت آن خواست کیک کہ او بنجائی حکومت تون ہیت کے کہ او دمدستی سویڈن نا سفیر ءِ بٹنگسا دا گندہ انگا حرکت آ پاکستانی الس نا ڈکھ و است ہسونی آن آگاہ کے و قرآن پاک نا بے حرمتی کروک بندغ آتا برخلاف دمدستی سخت کارروائی ءِ پک کے‘ ہندن دا باندات آ اقوام متحدہ و او آئی سی تون ہم ہیت کننگے تاکہ آخبت اٹ دا وڑ انا فعل تے توننگ کن آخبتی ءُ لائحہ عمل اس پک کننگ مرے۔ قرار داد آتینا خیال آتا درشانی ءِ کرسا اصغر ترین پارے کہ دا وڑ انا واقعہ غاتیان مسلمان تا است ہسون مسنے‘ دانا برخلاف حکومت پاکستان کل فورم تیا برانز ریکارڈ کرفے۔ اسپیکر مذمتی قرارداد ءِ امنائی اٹ ایوان نا سلاہ اٹ منظور کرے۔ پارلیمانی سیکرٹری خلیل جارج ناکنڈآن مذمتی قرارداد اٹ موقف تینائی کننگا کہ تدوک آ دے پولیس لائن پشاور اٹ نماز نا وخت آ خودکش بمب دھماکہ ٹی 95بے گناہ وکودک بندغ شہید و 221 آن زیات بندغ ٹھپی مسر دا واقعہ نا مذمت ءِ کیوہ انتئے کہ اسلام نا پن آ نماز ناوخت آ مسیت و کودک آشاری تیا جلہو بد ءُ فعل اسے۔ پاکستانی الس انتہا پسند آتا بے بنداو نظریہ و مذہب نا غلط تشریح کروک آتا درست کرینے‘ دا وڑ انا لغوری آ جلہو آک دہشتگردی نا برخلاف ننا قومی عزم ءِ نزور کننگ کپسہ۔
(آن لائن)