بنجا 75 ارب ءِ تتو تو بلوچستان مالی تنکی نا گواچی مریک، فرح عظیم

کوئٹہ : بلوچستان حکومت نا ترجمان فرح عظیم شاہ پارینے کہ بیلہ بس شکست اٹ 42 بندغ زوال مسنو‘بنائی جاست پاست اٹ شکست نا سوب تیزرفتاری پک مسنے‘ حکومت و انتظامیہ تیز رفتاری ءِ توننگ کن ٹریکر سسٹم ءِ فعال کرسا پین ہم گام گیج کرینے‘ بنجاءِ بلوچستان نا 75 ارب روپئی تروئی ءِ‘ ہرافتا تفننگ نا سوب آن صوبہ مالی تنکی نا گواچی مننگ کیک‘بنجا ناکنڈآن سلوک پیسہ غاتے تننگ نا باور کرفنگانے۔ دا خیال آتا درشانی ءِ او سَے شنبے نادے وزیراعلی سیکرٹریٹ اٹ پریس کانفرنس کرسا کرے۔ حکومت بلوچستان نا ترجمان پشاور دھماکہ نامذمت ءِ کرے‘ اوپارے کہ بیلہ بس انا سانحہ است ہسون کروک ءُ واقعہ اسے دا وخت اسکان مروک بنائی جاست پاست اٹ شکست نا سوب اوور اسپیڈ پک مسنے‘ بس مالک آک اسپیڈ نا جاچ ہلنگ کن خلنگوک ٹریکر سسٹم نا پیسہ غاتے کمپنی تے تتنو ہرانا سوب آن ٹریکر سسٹم بند کننگاسس‘ نن کوشست کرینن کہ داسہ ٹریکر سسٹم ءِ فعال کننگ کن بس آتا روٹ پرمٹ تون گنڈنگے‘ ہرا بس یا کمپنی ٹریکر سسٹم ءِ فعال کپک اونا روٹ پرمٹ ءِ منسوخ کننگک و ڈیور تے آن لائن ڈرائیونگ لیسن تننگ انگ ءِ۔ اوپارے کہ بیلہ شکست نا بس ملک آتا برخلاف مقدمہ درج کننگانے دزگیری کن ہم گام گیج کننگ انگ ءِ۔ اوپارے کہ بلوچستان نا بنجا غان جم وڑ اٹ 75 ارب روپئی سلوک ءُ ہرافتے وخت آ تفننگ ناسوب آن بلوچستان مالی تنکی نا گواچی مننگ کیک۔ بنجا بلوچستان نا مالی مشکل آتے مون آتخسا دمدستی سلوک پیسہ غاتا تننگ ءِ پک کے تاکہ صوبہ نا مالی ویل زیات مف۔ اوپارے کہ بلوچستان نا قومی شاہراہ تے دو رویہ کننگ کن دمدستی گام گیج کننگے‘ وزیراعظم شاہراہ تے دورویہ کننگ نا ہرا پڑو ءِ کریسس اوڑا دمدستی عملدرآمد ءِ پک کننگے۔ او پارے کہ ساڑی حکومت الس نا آسراتی کن بھاز گام گیج کرینے ہرافتے ٹی ریکوڈک نا ڈٹ پورو مننگ اٹی ءِ‘ ہندا وڑ ہیلتھ کارڈ کسان کارڈ جاری کننگ تون اوار انڈومنٹ فنڈ اٹ12 ارب ودفنگانے۔ اسہ سوج اسے نا ورندی ٹی اوپارے کہ مسافر کوچ آتے ٹی ازباب آتا فراوانی ءِ پک کرسا شکست آتے توننگ کن گام گیج کننگ انگ ءِ دا رد اٹ محکمہ ٹرانسپورٹ و تعلقدار کمامدار آک پبی وڑ اٹ گام گیج کننگ اٹی ءُ۔

(آن لائن)