کوروناسوب آن چندی ملک آک تینا سیم تے سیل کرینو ،حاجی نورمحمد خان
Get real time updates directly on you device, subscribe now.
ہرنائی (آن لائن) بلوچستان عوامی پارٹی نا بنجائی راہشون و صوبائی وزیر حاجی نورمحمد خان دمڑ اسک پارینو کہ کوروناسوب آن چندی ملک آک تینا سیم تے سیل کرینو و حکومت پاکستان ہم کورونا ءِ توننگ و الس ءِ داڑان بچفنگ کن تیناسیم تے سیل کرے‘ ہراٹی چمن سیم ہم اوار ءِ و داسکان چمن سیم و ایلو سیمک سیل ءُ۔ صوبائی وزیر حاجی نورمحمد خان دمڑ پارے کہ دا پک ءِ کہ چمن سیم اسہ اہم ءُ ویل اسے‘ ہمو جاگہ نا بندغ آک چمن سیم ءِ بند کننگ نابرخلاف ہڑتال کریر و دھرنا تسر و تُو اسے آن دا دھرنا برجاءِ‘ا خیر اٹ وزیراعلیٰ بلوچستان میرجام کمال خان دانا نوٹس ءہلک چمن نا الس نا ویل آتے مون آتخسا وزیراعلیٰ بلوچستان اسہ پارلیمانی کمیٹی اس ٹہیفے ہراٹی صوبائی وزیر داخلہ میر ضیاءلانگو، اے این پی نا صوبائی صدر و پارلیمانی لیڈر اصغر خان اچکزئی، صوبائی اسمبلی نا باسک مبین خلجی و ای اوار ئسن‘ نن چمن نادورہ ءِ کرین ‘ پارلیمانی کمیٹی دانا جم رپورٹ جوڑ کرسا وزیراعلیٰ بلوچستان آ راہی کرینے‘ وزیراعلیٰ بلوچستان میرجام کمال خان دا بابت سنجیدہ ءِ‘ وزیراعلیٰ بلوچستان چمن سیم ءِ دوار ملنگ نابابت غٹ لائن فورسز‘ ایجنسی و اسٹیک ہولڈر و ادارہ غاتون سلاہ کننگ اٹی ءِ‘ اوپارے کہ انت کہ فیصلہ کننگا او ملک وصوبہ نا الس نا فائدہ کن مریک۔