قبائلی نظام اٹ غٹ باندات آتا ایسر ارے‘ بلوچستان راہشون

ماشکیل (آن لائن) بلوچستان نا سیاسی وقبائلی متبر‘ صوبائی اسمبلی نا باسک آک پارینو کہ قبائلی نظام اٹ غٹ باندات آتا ایسر ارے‘ اسٹ ایلو نا رشتہ وتعلقداری تے برجا تخنگ کن قبائلی جھیڑہ غاتے چٹفنگک۔ دا خیال آتادرشانی ءِ او نوابزادہ حاجی میر لشکری خان رئیسانی، اسمبلی نا باسک ملک نصیر شاہوانی، ثنابلوچ، حاجی زابد ریکی وایلوفک تدوک آدے ریکی وشاہوانی قبیلہ نا نیام اٹ برجا خونی جھیڑہ ناوخت انا وخت آ تران کرسا کریر۔ داکان مست شاہوانی قبیلہ ناکنڈآن کاشف شاہوانی ناکماشی ٹی ملک نورجان شاہوانی، حاجی گل شاہوانی، ملک نصیر شاہوانی وایلوفک ریکی ہاﺅس آ میڑھ بسر ہراڑے میربہروز ریکی، میرزابد ریکی، میرمحمد عارف ریکی، میرشہروز ریکی، میراحسان الہی ریکی‘ جیندخان ریکی وایلوک بلوچی ربیدہ نارد اٹ میڑھ ءِ امنا کرسا اودے شرف تسر وخیر کریر۔دا وخت آ ہڑتوم آپڑک میرمحمدعارف ریکی، کاشف شاہوانی وایلوفک اختلاف آتے چٹفسا شیر وشکر مسر۔ داوخت آ نوابزادہ حاجی میرلشکری خان رئیسانی، صوبائی اسمبلی نا باسک ثناءبلوچ، میرگوہرخان ساتکزئی وایلوفک ہم ساڑی ئسر۔ دا وخت آ تران کرسا نوابزادہ حاجی میر لشکری خان رئیسانی پارے کہ قبائلی نظام اٹ کل باندات آتا ایسر ارے‘ جھیڑہ غاتا خیر اکن بلوچی میڑھ بھاز اہم ءِ۔دا وخت آ اسمبلی نا باسک حاجی زابد ریکی پارے کہ بلوچی روایت آتا رد اٹ شاہوانی قبیلہ نا میڑھ ءِ امنا کینہ ‘ اینو آن پد ننا نیام اٹ ہچ ءُ جھیڑہ اس مفک۔