مسکوہی ڈپٹی کمشنر نا منظور کروک 6 واٹرسپلائی تیا کاریم سلوک ءِ،علیم مینگل

قلات (فیض نیچاری) قلات نا کلی یالو نا باتیک برانز کرسا پارینو کہ یالو ٹی واٹرسپلائی ایکسین پی ایچ ای نا بددیانتی نا سوب آن کرپشن ناگواچی ءِ و ایکسین و ایس ڈی او نا واکداری تے اسہ چناسے ترسا علاقہ ءِ اونا دوٹی تننگانے‘ وزیراعلیٰ بلوچستان و صوبائی وزیر داخلہ صوبائی محتسب اعلی و ڈپٹی کمشنر قلات نوٹس ہلسا علاقہ نایل ءِ ایسر کیر‘ دا خیال آتا درشانی ءِ او میڈیا نا نمائندہ غاتے واٹر سپلائی ءِ تننگ ناوخت آ برانز کرسا کریر۔برانزی تا کماشی ءِ بلوچستان نیشنل پارٹی نا ضلعی انفارمیشن سیکر ٹری عبدالعلیم مینگل‘ میر انور مینگل وایلوفک کریر۔ ترانکار آک تران کرسا پاریر کہ مسکوہی ڈپٹی کمشنر شیہک بلوچ قلات کن 6 ٹیسٹ واٹرسپلائی منظور کرفے ہرافتا کاریم ءِ ایکسین پی ایچ ای نیمہ غا السا کرپشن نا گواچی کرے‘ دَرو ہراتم پوسکن آ واٹرسپلائی نا بناءِ ننگا تو سما تما کہ واٹرسپلائی ءِ 1000فٹ آن کم کرسا 500 فٹ خلنگانے و واٹرسپلائی ٹی متکن ءُ زنگی ءُ لولہ‘ کیسنگ و خراب ءُ کیبل شاغنگانے۔ ہرادے کلی یالو نا باتیک اسُل امنا کپسہ‘ برانزیک 25 جولائی اسکان ناالٹی میٹم ترسا پاریر کہ اگہ کاریم ءِ پورو کننگتو تو برانزی تحریک چلیفسا پی ایچ ای آفس نا مون آ دھرنا ترسا مین آر سی ڈی روڈ ءِ پورو وڑ اٹ جام کینہ۔