پاکستان نا شونداری، سوگوی و شونہالی کن کل اکائی تا سوگوی المی ءِ،جعفرخان مندوخیل

لاہور، کوئٹہ، گورنر بلوچستان جعفر خان مندوخیل گورنر پنجاب سردار سلیم حیدر خان تون گورنر ہاؤس لاہور اٹی اوڑدہی کرے۔ دا وخت آ گورنر گلگت بلتستان سید مہدی شاہ ہم ساڑی ئس۔ اوڑدہی ٹی ملکی سیاسی حالیت، بنجا و صوبہ غاتا نیام اٹ جوان انگا تعلقداریک، بین الصوبائی کمکاری و قومی سیوت نا شون اتون اوار تین پہ تینی است خواہی نا باندات آ گپ وتران مس۔ ہڑتوم آ راہشونک بلوچستان و پنجاب نا میڈیکل یونیورسٹی تا نیام اٹ تعلیمی و پٹ وپولی اواری ءِ شون تننگ، طالب علم و فیکلٹی تا ہل وتس و طبی تعلیم و ہیلکاری نا پوسکن آ آزموندہ غاتیان فائدہ ہرفنگ نا گرج آ زور شاغار۔ گورنر بلوچستان جعفرخان مندوخیل پارے کہ پاکستان نا شونداری، سوگوی و شونہالی کن کل بنجائی اکائی تا نیام اٹ سوگو رابطہ، تین پہ تینی پت و اسیجائی کوشست آک المی ءُ۔ دا رد اٹ السی کہول آ رابطہ غاتے ودفنگ، ربیدگی و راجی ہن وبر انا شون تننگ و اسہ ایلو نا آزموندہ غاتیان فائدہ ہرفنگ نا اہمیت ءِ ہم پیدوار کننگا۔ گورنر بلوچستان، بلوچستان اٹی بڑزکو تعلیم نا شون، پبلک سیکٹر یونیورسٹی تا واکداری ٹی ودکی، ریسرچ نا سرجز آتا است بڈی و تعلیمی ادارہ تا نیام اٹ رابطہ جوڑ کننگ کن پنجاب نا آزموندہ و چاہنداری آن فائدہ ہرفنگ نا گرج آ زور شاغا۔ دا وخت آ گورنر پنجاب سردار سلیم حیدر خان باور کرفے کہ بلوچستان نا طالب علم آتے پنجاب نا آب اٹو تعلیمی ادارہ غاتیٹی داخلہ نا وارخواہی فراوان کننگ و بڑزکو تعلیم نا دوئی کننگ اٹی وس انا کچ آ آسراتی و کمکاری فراوان کننگک۔