کرونا وائرس ‘ کل المی آ گڑاتے تفتان سیم آ سر کننگانے، لیاقت شاہوانی

کوئٹہ(آن لائن)حکومت بلوچستان نا ترجمان میر لیاقت شاہوانی پارینے کہ ڈبلیو ایچ او کروناوائرس ئِ جہانی دَین اس پن کرے، ڈبلیو ایچ او کروناوائرس نا بابت ایس او پیز ہم جاری کرے، وزیر اعلی بلوچستان نا کماشی ٹی دیوان اٹ اہم ئُ فیصلہ کننگا، ایران اٹ کرونا وائرس نا سوب آن کل المی آ گڑاتے تفتان سیم آ سر کننگانے۔ بلوچستان آن ایران آ ہنوک آ بندغ آتےا رکھ ئِ۔ 7ہزار آن زیات پاکستانی باتی ایران آ ہناسر۔ وزیراعلی جام کمال ایرانی حکومت تون حال احوالی ئِ۔ اپوزیشن جماعت آک کورنا وائرس آ تنقید کننگ نا جاگہ غا حکومت تون ملسا گام گیج کیر۔ دا خیال آتا درشانیئِ او سی ایم ہاﺅس اٹ پریس کانفرنس کرسا کرے، لیاقت شاہوانی پارینے کہ یکم مارچ آن دا وخت اسکان پنچ ہزار پاکستانی باتی پدی ملک آ سر مسنو، کل پاکستانی باتی تا اسکریننگ مسنے، پاکستان ہاوس قرنطینہ سینٹر اٹ 18 سد 91زائر قرنطینہ ئِ 14مارچ اسکان پورو کیرہ۔ تفتان سیم انا ماس آ پنچ جاگہ ہرافک جوڑ ئُ قرنطینہ سینٹر، اوفتے ٹی کل 4400 زاہر و ایلو بندغ آک رہنگ انگ ئُ، او پارینے کہ پاک فوج و محکمہ جانجوڑی نا کنڈآن میڈیکل کیمپ آک تفتان اٹ خلوک ئُ۔ تفتان سیم نا خڑک آ ذموبائل لیبارٹری اس ہم جوڑ کننگانے۔ 10 بسترہ نا آئیسولیشن وارڈ فاظمہ جناح چیسٹ اینڈ جنرل ہسپتال اٹ جوڑ کننگانے۔ 24 بسترہ انا آئیسولیشن وارڈ شیخ زید ہسپتال اٹ جوڑ کننگانے۔ حکومت بلوچستان تون ماسک، گلبز، سینٹائیزر تون اوار ایلو المی آ گڑاک بھاز کچ اٹ ساڑی ئُ۔ 14 مارچ آ پاکستان ہاوس اٹ ہندی بندغ آتا کورنٹائن پورو مریک۔ او پارینے کہ کورنٹائن ئِ پورو کروک آ زائر تے کلیئرنس سرٹیفکیٹ تننگک۔ کورنٹائن نا عمل ئِ پورو کروک آ زائر تے اوفتا علاقہ غاتے آ راہی کننگک۔ حکومت بلوچستان نا ترجمان لیاقت شاہوانی پارینے کہ بلوچستان حکومت کرونا وائرس تون مون تننگ کن بنجاہ غا کمک خواہسنے۔ کرونا وائرس تون مون تننگ کن پین کیٹس و ایلو المی آ گڑاتا گرج ئِ۔ بنجائی حکومت کرونا وائرس تون مون تننگ کن ننا کمک ئِ کے۔ بلوچستان اٹ ہچ ئُ بندغ اس نرہنگ اٹ سرسہب متنے۔ ایران آن بروک آ کل ئِ بندغ آتے قرنطینہ سینٹر اٹ جاگہی کننگانے۔ کروناوائرس نا توننگ کن افواج پاکستان نا ہم ننتون کمک ارے۔ پاک فوج نا اسہ پین دستہ اس ڈاکٹر تا ٹیم ئِ ہرفسا تفتان آ راہی مریک۔