تعلیم، بنداوی آسراتی و شاری ویل آتا ایسری کن بھرمی گام گیج کننگے،عائشہ زہری

قلات، بلوچستان نا تاریخی شار قلات نا سب ڈویژن خالق آباد نا تاریخ اٹی اولیکو وار نیاڑی تا ویل آتا ایسری کن خصوصی غاو دیوان ڈپٹی کمشنر انجینئر عائشہ زہری نا کماشی ٹی اڈ ہلک، ہراٹی نیاڑی و مسڑ طالب علم آتے تینا ویل آتے دراست ضلعی انتظامیہ و تعلقدار کمامدار آتا مون آ پیش کننگ نا وارخواہی فراوان کننگا۔ خصوصی غاو دیوان اٹی ایف سی 64 ونگ نا کرنل رضوان، ڈی ایس پی خالق آباد قادر لانگو، ایس ایچ او فیاض شاہوانی، تحصیلدار امجد علی، محکمہ تعلیم نا بڑزکو افسر آتتون اوار نیاڑی و مسڑ طالب علم آتا بھلو کچ اس بشخ ہلک۔ دا وخت آ نیاڑی و مسڑ طالب علم آک تینا ویل و مشکل آتیان ڈپٹی کمشنر قلات انجینئر عائشہ زہری ءِ معلومدار کریر۔ اوفک گرلز ہائی اسکول اٹی نان ٹیچنگ اسٹاف نا کمتی، گرلز ہائر سیکنڈری اسکول اٹی کلاس روم تا کمتی‘ تعلیمی ادارہ غاتیٹی پریکٹیکل لیبارٹری مفننگ‘ این سی ایچ ڈی استاد آتے پکا کننگ و تنخواہ تیٹی ودکی، خالق آباد اٹی پبلک لائبریری جوڑ کننگ‘ شار اٹی کیہی دے آن بجلی نا پورو بندی‘ گیس مفننگ‘ خالق آباد انٹر کالج نا بندی، شار اٹی سفائی نا خراب حالیت و کلی گزک نا الس ءِ کنوئی آ سفا انگا دیر انا فراوانی تون اوار ایلو اہم ویل آتے پیش کریر۔ ڈپٹی کمشنر قلات انجینئر عائشہ زہری نیاڑی و مسڑ طالب علم آتا ویل آتے بھاز سکوت و سنجیدگی اٹ خف تورے و اوفتا دمدستی ایسری کن تعلقدار محکمہ غاتا افسر آتے المی پرمان جاری کرے۔ او تعلقدار کمامدار آتے پارت کرے کہ السی ویل آتا ایسری اٹی ہُرے کننگپ و تعلیم، بنداوی آسراتی و شاری ویل آتا رد اٹ بھرمی گام گیج کننگے۔ ڈپٹی کمشنر انجینئر عائشہ زہری پارے کہ نیاڑیک راج انا اسہ اہم و شرفمند ءُ بشخ اسے ءُ، و اوفتا ویل آتا ایسری، حق آتا رکھ و اوفتے بنداوی آسراتی تا فراوانی ضلعی انتظامیہ نا اہم اولیت آتیٹی اوار ءِ‘ نیاڑی تے مون تروک ویل آتا ایسری کن خصوصی غاو دیوان اڈ تننگ ہندا ارادگی نا بشخ ءِ‘ تاکہ نیاڑیک بے خلیس آن تینا غاو و مشکل آتے دراست انتظامیہ نا مون آ پیش کننگ کیر۔ غاو دیوان نا گڈسر اٹ ڈپٹی کمشنر انجینئر عائشہ زہری و ایلو افسر آک نیاڑی و مسڑ طالب علم آتیٹی شال بشخ وپانٹ کریر واوفتا است بڈی ءِ کریر۔