السی ویل آتا ایسری نا بابت ہُرے مننگ ءِ اسُل سگپنہ،کمشنر لورالائی ڈویژن
سرکاری دفتر آتیٹی بروک آ سوالی و الس تون خوش تَبی، شرف و زموار وڑ اٹ پیش بننگے
لورالائی، کمشنر لورالائی ڈویژن ولی محمد بڑیچ پاش کرینے کہ سرکاری زمواری تیٹی ڈیوالئی غیر حاضری و السی ویل آتا ایسری ٹی ہُرے ہچ ءُ وڑ اسے ٹی سگنگپک، کل افسر و ملازم آک پیشگی حوال و مجاز اتھارٹی نا موکل آن بیدس تینا اسٹیشن ءِ یلہ کپس، آخا تو تعلقدار کارندہ غاتا برخلاف محکماتی کارروائی کننگک، دا خیال آتا درشانی ءِ او ڈویژنل ہیڈ آتا دیوان نا کماشی ءِ کرسا کرے، ہراٹی چندی محکمہ غاتا سروک آک بشخ ہلکر و تینا تینا محکمہ غاتا جم کارکڑد، برجا شونداری ڈٹ، بست و بندی باندات، و الس ءِ فراوان کننگوک آ آسراتی تتون تعلقدار باندات آتا سرجم بریفنگ تسر، کمشنر ولی محمد بڑیچ افسر آتے پارت کرے کہ او تینا محکمہ غاتا کارکڑد ءِ گچین جوڑ کننگ کن فیلڈ اٹی تینا ساڑی گری ءِ پک کیر و ریسہ اٹ فیلڈ وزٹ آتے کیر، او پارت کرے کہ دورہ غاتا وخت آ برجا شونداری کاریم آتا فوٹو، پیش رفت و کارکڑد آ تالان باقاعدہ رپورٹ آتے شین ترسا پیش کننگے، وخت اس کہ غیر حاضر ملازم آتا برخلاف قاعدہ و ضابطہ غات رِد اٹ کارروائی کننگے، او پارے کہ سرکاری دفتر آتیٹی بروک آ سوالی و الس تون خوش اخلاقی، شرف داری و زموار وڑ اٹ پیش بننگے، السی غاو تے اولیتی بنداو آ خف توننگے و اوفتا دمدستی ایسری کن بھرمی گام گیج کننگے تاکہ سرکاری ادارہ غاتیا الس نا پت پین سوگو مرے، دیوان نا نیام اٹی کمشنر کل محکمہ غاتیان برجا و پورو مروک آ شونداری ڈٹ آتا سرجم، تفوئی کاریم تا رفتار و آب آن بابت رپورٹ آتے ہم بٹنگا، او زور شاغا کہ شونداری ڈٹ آتا وخت آ پوروی، فنڈ آتا شفاف کاریم اٹ اتنگ و الس ءِ بنداوی آسراتی تا فراوانی تعلقدار محکمہ غاتا سروک آتا اولیکو زمواری ءِ، دیوان اٹی چندی محکمہ غاتے مون تروک آ بست و بندی ویل و ایلو باندات آتا بابت ہم سرجم جاچ ہلنگا۔