صوبہ غاتا جوڑ کننگ نا بابت الس آن بایدے سلاہ ہلنگے،عطاء اللہ تارڑ
فیصلہ السی سلاہ نا رداٹ بایدے مرے، ریفرنڈم کرفنگ اٹ ہچ ءُ خرابی اس اف،السی سلاہ مونی اتنگ نا کسر ءِ آوار کننگے
اسلام آباد، بنجائی وزیر حوالکاری وشینکاری عطاء اللہ تارڑ پارینے کہ صوبہ غاتا جوڑ کننگ نا بابت الس نا سلاہ ءِ بایدے ہلنگے، اگہ الس پوسکن آ صوبہ غاتا جوڑ کننگ نا حق اٹی مرے تو صوبہ غاتے جوڑ کننگے، و اگہ مخالفت اٹی مرے تو داوڑ بایدے مف، آئین اٹی ریفرنڈم نا بابت شق پیدوار ءِ و قومی اہمیت یا السی است خواہی نا ہر باندات آ ریفرنڈم کرفنگ مریک۔ او دا ہیت آتے جمعہ مبارک نادے آ الیکشن کمیشن نا پیشن میڈیا تون ہیت وگپ کرسا کرے۔ الیکشن کمیشن اٹی سماعت نا بابت سوج انا بارواٹی بنجائی وزیر حوالکاری پارے کہ گوجرانوالہ اونا باوہ پیرہ ئی آ شار ءِ و او ڈسٹرکٹ بار انا جنرل سیکرٹری نا سلہ غا ہمونگ ہناسس، دادود اٹی ہچ ءُ گچین کاری اومیتدار اس ساڑی الوکہ۔ اوپارے کہ سلہ ریکارڈ آ ساڑی ئس ہرا الیکشن شیڈول آن مست ملاسس، ڈسٹرکٹ بار نا جنرل سیکرٹری اونا کولیگ ہم ارے۔ صوبہ غاتا جوڑ کننگ نا بابت سوج انا ورندی ٹی بنجائی وزیر پارے کہ صوبہ غاتا جوڑ کننگ نا بابت السی سلاہ ءِ بایدے ہلنگے، اگہ السی سلاہ صوبہ غاتا جوڑ کننگ نا حق اٹی مرے تو پوسکن ءُ صوبہ جوڑ کننگے، مخالفت اٹی مرے تو جوڑ کننگپ، السی سلاہ مونی اتنگ نا کسر ءِ آوار کننگے و فیصلہ السی سلاہ نا رداٹ بایدے مرے۔ اوپارے کہ ریفرنڈم کرفنگ اٹی ہچ ءُ حرج اس اف، آئین اٹی ریفرنڈم نا بابت شق پیدوار ءِ، قومی اہمیت یا السی است خواہی نا ہر باندات آ ریفرنڈم کرفنگ مریک۔ اوپارے کہ السی سلاہ ءِ مونی اتنگ کن الر۔ اوکان پد حالیت آتا جاچ ءِ ہلنگک۔ اوپارے کہ وزیراعظم محمد شہباز شریف نا صدر مملکت تون ہم اوڑدہی مسنے ہراٹی باندات آتیا گپ وتران و افہام و تفہیم تون مونی ہِننگ نا باندات آتیا سجفنگانے۔