صدرِ مملکت آصف علی زرداری و وزیراعظم شہباز شریف نا اہم اوڑدہی، سیاسی، زرگزرانی و سیکورٹی حالیت آ سلابت
لاہور، صدرِ مملکت آصف علی زرداری و وزیراعظم محمد شہباز شریف نا نیام اٹی لاہور اٹی اہم ءُ اوڑدہی اس مس، ہراٹی ملک انا جم سیاسی، زرگزرانی و سیکورٹی حالیت آتتون اوار مون تروک قومی چیلنج آتیا سلابت کننگا۔ ہڑتوم آ راہشونک ملک اٹی زرگزرانی سوگوی نا دوئی کننگ‘ سیاسی ہم گرنچی و شونداری کاریم تے ترند کننگ کن حکومتی سیوتی جماعت آتا نیام اٹی کمکاری ءِ برجا تخنگ نا ارادگی نا دوارگی ءِ پک کریر۔ وزیراعظم ہاؤس آن جاری اعلامیہ نا رِد اٹ صدرِ مملکت آصف علی زرداری شنبے آ مسکوہی وزیراعظم راجہ پرویز اشرف تون اوار ماڈل ٹاؤن لاہور اٹی وزیراعظم شہباز شریف نا ہنکین 95 ایچ آ سر مس، ہراڑے وزیراعظم اوفتے جم وجوش اٹ بخیر کرے‘ ہڑتوم آ راہشون تا نیام اٹی مروک آ اوڑدہی ٹی ملک ءِ مون تروک اہم سیاسی، زرگزرانی و سیکورٹی باندات آتیا سجفنگا‘ اعلامیہ نا رِد اٹ اوڑدہی ٹی زرگزرانی چیلنج، امن وایمنی ناحالیت و ملک اٹی سیاسی سوگوی نا بابت گپ وتران کننگا۔