پاکستان نا ریاض اٹی سعودی آرامکو نا انتظامی ماڑی آ حوثی جلہو نا کوشست نا مذمت

اسلام آباد، پاکستان سعودی عرب نا دارالحکومت ریاض اٹی سعودی آرامکو نا انتظامی ماڑی ءِ شست کننگ نا حوثی تا کوشست نا سخت انگا لوز آتے ٹی مذمت ءِ کرسا سعودی عرب نا برخلاف کل جلہو آتے دمدستی و بیدس شڑت آن بند کننگ نا خواست کرینے۔ ترجمان دفتر خارجہ پارینے کہ شاری میرات آتے شست کننگ انسانی زند و ڈیہہ انا سلامتی ءِ گوجالنگ آنبار ءِ‘ وخت اس کہ پاکستان سعودی عرب نا سلامتی، وتواجہی و ڈیہہ انا سالمیت نا رکھ اکن اونا پد اٹ سلوک ءِ‘ ترجمان دفتر خارجہ نا رِد اٹ ریاض اٹی سعودی آرامکو نا انتظامی ماڑی ءِ شست کننگ نا کوشست نا سوب آن ہچ ءُ جانی نسخان اس متو۔ پاکستان دا جلہو نا کوشست نا سخت انگا لوز آتے ٹی مذمت ءِ کیک و اودے ڈیہہ انا امن و سوگوی کن گڑتی نا سوب ءُ گام اس گوندک۔ ترجمان پارے کہ شاری و انتظامی میرات آتے شست کننگ انسانی زند آتا رکھ و ڈیہہ انا سلامتی نا بنداوی اصول آتے گوجالنگ آنبار ءِ۔