نصابی سرجز آتتون اوار ہم نصابی گو تا اڈ تننگ ہم بھاز اہم مریک،لعل جان جعفر

کوئٹہ، سیکرٹری ثانوی تعلیم بلوچستان لعل جان جعفر پارینے کہ طالب علم آتا ذہنی، علمی و جسمانی ردوم کن نصابی سرجز آتتون اوار غیر نصابی گو تا اڈ تننگ بھاز اہمیت تخک۔ سائنس، گوازی و تخلیقی سرجز آتا شون تننگ آن طالب علم آتیٹی تینے آ پت، جاست پاست نا رجحان و مثبت گوبر نا جوزہ شون ہلیک‘ دا خیال آتا درشانی ءِ او 7 نومبر آ پاکستان چلڈرن اکیڈمی ٹرسٹ کوئٹہ نا کنڈآن اڈ ہلوک انٹر اسکول بیڈمنٹن چمپین شپ، اسپیلنگ بی گو و سائنس اولمپیاڈ نا فائنلز و انعام بشخ وپانٹ کننگ نا دود آن خاص مہمان انگا وڑ اٹ تران کرسا کرے۔ 28 اکتوبر 2026ء آن بنا مروک آ دا گوتے ٹی کیہی تعلیمی ادارہ غاک پبی بشخ ہلکر۔ ایونٹ نا رد اٹ اسپیلنگ بی گو اٹ 45 اسکول، سائنس اولمپیاڈ ٹی 135 اسکول وخت اس کہ بیڈمنٹن چمپین شپ اٹی 135 اسکول بشخ ہلکر۔ بیڈمنٹن گوک گرلز سنگلز، بوائز جونیئر سنگلز و بوائز سینئر سنگلز نا کیٹیگری تیٹی اڈ ہلکر وخت اس کہ جم وڑ اٹ 355 مارومسڑ طالب علم آک تینا لائخی تا درشانی ءِ کریر۔ سیکرٹری اسکولز بلوچستان لعل جان جعفر تینا تران اٹی بیگم ثاقبہ رحیم الدین نا مُر ہُروک و بھلا کوشست آتے خراجِ تحسین پیش کرسا پارے کہ پاکستان چلڈرن اکیڈمی ٹرسٹ نا کنڈ آن چناتا تعلیمی، سائنسی و جسمانی ہیلکاری کن دا وڑ انا گوتا اڈ تننگ ستا کڑزوک ءُ گام اسے۔ او پارے کہ بلوچستان اٹی سائنس نا تعلیم نا بشخ اٹی تاریخی وڑ اٹ تعلیمی بھرم آک است جمی ناسوب متنو‘ دا وڑ انا حالیت آتیٹی سائنس اولمپیاڈ کون آ گوک طالب علم آتیٹی تجسس، جاست پاست، تخلیقی سوچ و سائنسی علم اتون است خواہی ودی کننگ اٹی اہم کڑد ادا کیرہ۔؛ او پاکستان چلڈرن اکیڈمی ٹرسٹ نا انتظامیہ ءِ سرسہب ایونٹ نا اڈ تننگ آ است انا ہُب اٹ مبارکبادی ہم تس‘۔ دود انا گڈسر اٹ خاص انگا مہمان لعل جان جعفر سرسہب آ مارومسڑطالب علم آتے ٹی ٹرافی، میڈل و سند بشخ و پانٹ کرے۔ او دا ارادگی نا درشانی ءِ کرے کہ بلوچستان نا تعلیمی ادارہ غاتیٹی سائنس، گوازی و ایلو مثبت ہم نصابی سرجز آتا شون تننگ کن دا وڑ انا کوشست آتا است بڈی برجا تخنگک۔