(ن) لیگ بلوچستان نا گرینڈ شمولیتی پروگرام آتا بنا 8 نومبر آن مریک،جمال شاہ کاکڑ

کوئٹہ، پاکستان مسلم لیگ (ن) بلوچستان نا جنرل سیکرٹری و قومی اسمبلی نا باسک جمال شاہ کاکڑ پارینے کہ بلوچستان اٹی مسلم لیگ (ن) اسٹ انگا متحرک سیاسی جماعت ءِ ہرا ساڑی سخت حالیت آتیان پد ہم عملی پڑ آ ساڑی ءِ و السی رابطہ غاتتون اوار پارٹی ءِ پین فعال و متحرک کننگ کن جہد ءِ برجا تخانے۔ پارٹی نا کنڈ آن 8 نومبر آن گرینڈ شمولیتی پروگرام تا بنا کننگ انگ ءِ۔ ہرانا رد اٹ 14 نومبر اسکان مچ آ صوبہ غان پدریسہ شمولیتی جلسہ و بھلا مچی تا بست وبند کننگک‘ او پارے کہ شمولیتی مہم نا ریسہ ٹی اولیکو بھلا جلسہ اینو یک شنبے 8 نومبر آ نیمروچ نا 2 بجہ میلاک ہال، گلستان روڈ کوئٹہ ٹی اڈ ہلیک‘ ہراٹی جتا سیاسی و راجی شخصیت و ایلو بندغ آک مسلم لیگ (ن) اٹی اوار مریرہ‘ جلسہ غان اسپیکر قومی اسمبلی سردار محمد ایاز صادق ویڈیو لنک انا کمک اٹ تران کیک وخت اس کہ صوبائی جنرل سیکرٹری جمال شاہ کاکڑ، صوبائی وزیرک، پارلیمانی سیکرٹری و صوبائی اسمبلی نا باسک آک ہم تینا خیال آتا درشانی ءِ کیرہ۔ دا خیال آتا درشانی ءِ او پارٹی نا سینئر سنگت آتتون اڈ ہلوک دیوان آن تران کرسا کرے۔ جمال شاہ کاکڑ پارے کہ مسلم لیگ (ن) بلوچستان اٹی تینا سیاسی سرجز آتے ودفنگ و السی رابطہ مہم ءِ پین گچین کننگ کن عملی گام گیج کننگ اٹی ءِ‘ 8 نومبر آن بنا مروک آ شمولیتی پروگرام پارٹی نا تنظیمی سرجز آتے پوسکن ءُ ساہ اس ایتک و کیہی علاقہ غاتیٹی جماعت ءِ پین سوگو جوڑ کننگ اٹی کمک رسینگک۔ او پارے کہ بلوچستان ءِ نو گو ایریا گوندنگک ولے مسلم لیگ (ن) نا پدریسہ شمولیتی پروگرام و سیاسی سرجز دا ہیت انا شاہدی ءِ کہ اسہ متحرک ءُ سیاسی جماعت اس سخت حالیت آتیٹی ہم الس نا نیام اٹی ساڑی مریک۔ پارٹی ٹی اوار مننگ نا خواہندار بندغ آتا ودوک آ است خواہی دا ہیت انا ڈیک ءِ کہ مسلم لیگ (ن) نا کماشی و پالیسی تیا الس نا پت ودنگ اٹی ءِ‘ جمال شاہ کاکڑ معلومدار کرے کہ 8 نومبر آ گرینڈ شمولیتی جلسہ غان پد 9، 10، 11، 12، 13 و 14 نومبر اسکان پدریسہ شمولیتی دود و بھلا السی مچیک اڈ تننگرہ۔