شاری تے رکھوک سفری آسراتی فراوان کننگ اولیکو اولیت ءِ،ماریہ شمعون

اوستا محمد، اوستا محمد اٹی ٹریفک نا نظام ءِ منظم جوڑ کننگ، بنجائی شاہراہ تیا بھلا رش انا چٹفنگ و شاری تے ہن و بر نا گچین آسراتی فراوان کننگ کن ڈپٹی کمشنر اوستا محمد نا خصوصی پارت آ ضلعی انتظامیہ عملی گام گیج آتا بناءِ کرینے۔ دا رد اٹ اسسٹنٹ کمشنر اوستا محمد ماریہ شمعون نا کماشی ٹی اسہ اہم ءُ دیوان اس اڈ ہلک، ہراٹی تحصیلدار، چیف آفیسر میونسپل کمیٹی و صدر رکشہ ایسوسی ایشن بشخ ہلک دیوان اٹی شار انا جتا علاقہ غاتیٹی، خاص وڑ اٹ بنجائی شاہراہ و اہم چوک آتیا رکشہ غاتا سٹی پارکنگ نا سوب آن ٹریفک نا روانی ٹی ودی مروک اڑاند آتا جم جاچ ءِ ہلنگا۔ دیوان اٹی سلابت آن پد فیصلہ کننگا کہ شار اٹی ٹریفک نا نظام ءِ گچین جوڑ کننگ کن کل رکشہ غاتے گنداخہ بس اڈہ غا گدریفنگک وخت اس کہ ریلوے پھاٹک آن شبیر چوک اسکان رکشہ غاتا پارکنگ آ پورو رکھ مریک‘ دا گام انا مسخت بنجائی شاہراہ تے ٹریفک کن ملوک تخنگ، ٹریفک جام آن بچنگ و پیادہ ہنوک آ شاری تتون اوار کل الس ءِ ہن و بر اٹی اسانی فراوان کننگ ءِ۔ دیوان آن دمدستی پد اسسٹنٹ کمشنر ماریہ شمعون تعلقدار افسر آتتون اوار جاگہ غا سرمس و فیصلہ آ عملدرآمد ءِ پک کرسا شار اٹی ساڑی کل رکشہ غاتے پک کروک ہند گنداخہ بس اڈہ غا گدریفے۔ دا وخت آ رکشہ ایسوسی ایشن نا نمائندہ غاتے ہم انتظامیہ نا فیصلہ غا عملدرآمد و ٹریفک نظم و ضبط برجا تخنگ کن کمکاری نا پارت کننگا۔ اسسٹنٹ کمشنر ماریہ شمعون پارے کہ شار اٹی ٹریفک نا روانی برجا تخنگ و الس ءِ مون تروک مشکل آتا ایسری کن کروک گام گیج آتیا آخبتی بنداو تیا عملدرآمد برجا تخنگک تعلقدار ادارہ غاک دا نظام نا پدریسہ چاروکی ءِ کیر تاکہ دوارہ کانود آن چَپ پارکنگ و ٹریفک نا روانی ٹی اڑاند ودی مف۔ ضلعی انتظامیہ نا رِد اٹ شار اٹی ٹریفک نا نظام ءِ گچین جوڑ کننگ و شاری تے رکھوک، آسان و بیدس اڑاند سفری آسراتی فراوان کننگ انتظامیہ نا اولیت آتیٹی اوار ءِ، ہراڑکن کل تعلقدار ادارہ غاتے تین پہ تینی رابطہ و زمواری اٹ تینا کڑد ءِ ادا کننگ نا پارت کننگانے۔