اقبال تینے آ پتداری جیرت و عملی جہد انا کسر نشان ایتک،پروفیسر سبین بلوچ

گوادر، گورنمنٹ گرلز ڈگری کالج گوادر اٹی شاعرِ مشرق علامہ محمد اقبالؒ ءِ خراجِ عقیدت پیش کننگ کن یومِ اقبال نا رد اٹ اسہ شرفدار ءُ دود اس اڈ تننگا‘ ہراٹی مسڑ طالب علم آک جوش و جوزہ اٹ بشخ ہلکر۔ دود انا بنا تلاوتِ کلامِ پاک و نعتِ رسولِ مقبول ﷺ آن مس۔ دا وخت آ طالب علم آک علامہ اقبالؒ نا فکر و شاعری آ تالان تران‘ کلام، ملی و فکری نظم، ڈرامہ و ٹیبلو پیش کریر، وخت اس کہ ”شکوہ و جوابِ شکوہ“ نا خصوصی پیشکش ہم دود انا بشخ ئس۔ داکان بیدس علامہ اقبالؒ نا زند و فلسفہ خودی نارد اٹ کوئز گوک ہم اڈ تننگار۔ پرنسپل کالج پروفیسر سبین بلوچ تران کرسا علامہ اقبالؒ نا فلسفہ خودی، ورنا چین اکن کلہو و علمی و ادبی خذمت آتیا روشنائی شاغا او پارے کہ اقبال نا کلہو تینے آ پت، خودداری، بڑزکو حوصلہ و عملی جہد انا سبخ ایتک۔ او مسڑ طالب علم آتیا زور شاغا کہ او اقبال نا فکر آتے تینا عملی زند انا بشخ جوڑ کرسا علم و کڑدار نا کمک اٹ ملک و قوم انا شونداری ٹی تینا کڑد ءِ ادا کیر۔ دا وخت آ میڈم شہانہ، میڈم مریم پیربخش و لیکچرار میڈم زرگل ہم علامہ اقبالؒ نا زند، شاعری و فلسفہ حیات آ تینا خیال آتا درشانی ءِ کریر و طالب علم آتے اونا کلہو آن درستی راستی کرفیر۔ دود انا اخیر اٹ پرنسپل پروفیسر سبین بلوچ نمان کارکڑد نشان تروک طالب علم آتیٹی نغد انعام بشخ و پانٹ کرے وخت اس کہ ایلو شریدار آتے سفتی سَند تس و اوفتا است بڈی ءِ کرے۔ دود انا مسخت طالب آتیٹی فکرِ اقبال، خودی، تینے آ پت و علم و عمل نا شعور بیدار کننگ ئس۔