پاسپورٹ نظام اٹ جوانی اتنگ کن حکومتی گام گیج آک ستا کڑزرہ،سیدال خان ناصر

اسلام آباد، ڈپٹی چیئرمین سینٹ سیدال خان ناصر پاسپورٹ نا جاری کننگ نا نظام اٹی گچینی‘ پوسکنوڑ ٹیکنالوجی نا کاریم اٹ اتنگ و السی آسراتی تا شون تننگ کن حکومت نا کنڈ آن کروک گام گیج آتا ستاءِ کرسا پارینے کہ پاسپورٹ ڈائریکٹوریٹ نا کارکڑد و ادارہ ئی اصلاحات کن کروک کوشست آک ستا کڑزرہ۔ او پارت کرے کہ دا گام گیج آتے پین مونی درسا پاسپورٹ نا نظام ءِ پوسکنوڑ خواست آتتون ہمگرنچ کننگے۔ ڈپٹی چیئرمین سینٹ تون ڈائریکٹر جنرل امیگریشن اینڈ پاسپورٹس چوہدری محمد علی رندھاوا تون اوار قبائلی متبر‘وکیل‘ سول سوسائٹی نا نمائندہ، طالب علم‘ زندانا جتا جتا بشخ آتتون تعلقدار شخصیت آک پارلیمنٹ ہاؤس اٹی اوڑدہی کریر۔ دا اوڑدہی تیٹی السی ویل، قومی باندات و ملکی سیاسی و زرگزرانی حالیت آتیا گپ وتران کننگا۔ ڈی جی پاسپورٹس تون اوڑدہی نا وخت آ پاسپورٹ جاری کننگ نا ساڑی نظام، ادارہ نا کارکڑد‘ سیکورٹی فیچرز و الس ءِ فراوان کروک آسراتی تا جاچ ءِ ہلنگا۔ دا وخت آ سیدال خان ناصر پارے کہ پاسپورٹ نا نظام اٹی گچینی والسی آسراتی تیکن حکومتی گام گیج آک ستاکڑزرہ۔ تعلقدار ادارہ نا کارکڑد اٹی گچینی کن کروک کوشست آک ستا کڑزرہ، ولے الس نا آسراتی کن پین جوان گام گیج آتا گرج ءِ۔ او پارت کرے کہ پاسپورٹ جاری کننگ نا کل ریسہ غاتے ٹی پوسکنوڑ ٹیکنالوجی، ڈیجیٹل نظام و آٹومیشن نا کاریم اٹ اتنگ ءِ شون تننگے تاکہ درخواست آن ہلسا پاسپورٹ نا فراوانی اسکان نا عمل ترند‘ شفاف و آسان جوڑ کننگ مرے۔ شاری تے سٹی تل ول و بھازانتظار وانتظامی ول ویچڑیک مون تروئی تمپس وخت اس کہ السی غاو تا دمدستی ایسری ءِ ہم پک کننگے۔ ڈپٹی چیئرمین سینٹ پارے کہ پوسکنوڑ ٹیکنالوجی و گچین انتظامی حکمت عملی نا کمک اٹ الس نا پت ءِ پین سوگو کننگ مننگ کیک۔ او پاسپورٹ ڈائریکٹوریٹ نا جم کارکڑد نا ستاءِ کرسا پین گچینی‘ پوسکنوڑ جہانی آب و سیکورٹی خواست آتا رد اٹ اصلاحات برجا تخنگ آ زور شاغا۔