ڈیجیٹل سولمنائزیشن ماڈیول ،بلوچستان اٹی اولیکو وار ڈیجیٹل نکاح رجسٹریشن نا بنا، میرج سرٹیفکیٹ جاری

کوئٹہ، حکومت بلوچستان و نادرا نا تین پہ تینی کمک اٹ صوبہ ٹی اولیکو وار ڈیجیٹل نکاح رجسٹریشن و ڈیجیٹل سولمنائزیشن ماڈیول نا پائلٹ بنداو تیا سرسہب بنا کننگا۔ دا رد اٹ یونین کونسل حاجی غیبی روڈ، وارڈ نمبر 22، میٹروپولیٹن کارپوریشن کوئٹہ ٹی بلوچستان نا اولیکو ڈیجیٹل میرج رجسٹریشن سرٹیفکیٹ (MRC) جاری کننگا۔ حوال نا رِد اٹ بلوچستان نا اولیکو ڈیجیٹل وڑ اٹ رجسٹرڈ نکاح رجسٹرار مولوی سمیع اللہ نا رجسٹریشن و لیسن 28 اکتوبر 2026ء آ جاریکننگاسس، وخت اس کہ اونا کمک اٹ اولیکو نکاح نا ڈیجیٹل رجسٹریشن 29 اکتوبر آ پورو مس و 30 اکتوبر 2026ء آ میرج رجسٹریشن سرٹیفکیٹ جاری کننگا۔ دا اہم پائلٹ ڈٹ انا سرسہبی ٹی ڈاکٹر نوشین خان، ڈپٹی ڈائریکٹر میٹروپولیٹن کارپوریشن کوئٹہ، داؤد مومند، اسسٹنٹ ڈائریکٹر (CRVS) نادرا، و محمد عارف، فیلڈ آفیسر ضلع کوئٹہ اہم کڑد ادا کریر،خت اس کہ مولوی سمیع اللہ بلوچستان نا اولیکو ڈیجیٹل رجسٹرڈ نکاح رجسٹرار نا وڑ اٹ اولیکو نکاح نا رجسٹریشن سر تس۔ پوسکن آ ڈیجیٹل نظام نا رد اٹ رجسٹرڈ نکاح رجسٹرار پاک آئی ڈی موبائل ایپلیکیشن نا کمک اٹ نکاح نا جم والمی دستاویزات آک تعلقدار یونین کونسل آ راہی کننگ مریرہ‘ یونین کونسل سیکرٹری نا کنڈ آن پک و منظوری آن پد میرج رجسٹریشن سرٹیفکیٹ تینٹ تیار مریک۔ ہرادے نکاح رجسٹرار، بادشاہ وبرامی تینا تینا پاک آئی ڈی اکاؤنٹ آتا کمک اٹ ڈاؤن لوڈ و پرنٹ کننگ کیرہ۔ دا پوسکنوڑ ڈیجیٹل گام گیج انا بنداوی مسخت نکاح و برام نا رجسٹریشن نا عمل ءِ شفاف، رکھوک، گچین و ترند جوڑ کننگ، دستی کارروائی تیٹی کمتی اتنگ و شاری تے پوسکنوڑ آسراتی فراوان کننگ ءِ۔ بلوچستان اٹی دا ڈٹ انا سرسہب بنا سول رجسٹریشن سروسز نا ڈیجیٹلائزیشن نا کنڈ آ اسہ اہم ءُ مزل نا نشان اس گوندنگ انگ ءِ، ہراڑان آخبت اٹی دا آسراتی ءِ صوبہ نا ایلو یونین کونسل تسکان ودفنگ نا کسر ہم آوار مریک۔