بیرہ نمائش اس اف، بلوچستان نا کاروباری و صنعتی گمان تے کن اہم ءُ کمکار اسے،بلال کاکڑ BITE
Get real time updates directly on you device, subscribe now.
کوئٹہ، بلوچستان زرکاری بورڈ انا وائس چیئرمین بلال خان کاکڑ پارینے کہ 18 و 19 نومبر آ اڈ ہلوک بلوچستان انویسٹمنٹ اینڈ ٹریڈ ایکسپو (2026 BITE) صوبہ ٹی واپاری و کاروباری سرجز آتا شون تننگ، زرکاری نا پوسکن آ وارخواہی تا نشاندہی و زرگزرانی شونداری نا پوسکن آ کنڈ ءِ پک کننگ اٹی اہم کڑد ادا کیک۔ وزیراعلیٰ بلوچستان میر سرفراز بگٹی صوبہ ءِ ملکی و جہانی زرکاری نا بنجا جوڑ کننگ کن سنبرینگوک ءِ، وخت اس کہ بلوچستان زرکاری بورڈ دا وژن ءِ عملی دروشم تننگ کن پبی گام گیج کننگ اٹی ءِ۔ دا خیال آتا درشانی ءِ او بلوچستان انویسٹمنٹ اینڈ ٹریڈ ایکسپو 2026 نا تیاری و بست وبند آتا جاچ ءِ ہلنگ کن اڈ ہلوک دیوان نا کماشی ءِ کرسا کرے۔ دا وخت آ چیف ایگزیکٹو آفیسر عبدالمنان و ایلو تعلقدار کمامدار آک ہم ساڑی ئسر۔ دیوان اٹی ایکسپو نا جتاجتا انتظامی و تشہیری باندات‘ شریدار آتا بشخ ہلنگ، کاروباری ادارہ و زرکار آتا است خواہی ءِ ودفنگ و ایلو تعلقدار باندات آتیا جم گپ وتران کننگا۔ بلال خان کاکڑ پارے کہ 2026 BITE بیرہ اسہ نمائش اس آخا بلکہ بلوچستان نا کاروباری و صنعتی گمان تے ملکی و جہانی کہول آ درستی راستی کرفنگ نا اسہ اہم ءُ کمکار اس مریک۔ دا پلیٹ فارم نا کمک اٹ زرکار، صنعت کار، پوریاگر‘ کاروباری شخصیت‘ تعلقدار سرکاری ادارہ و جتاجتا واپاری تنظیم آتے اسہ جاگہ غا مچ مننگ نا وارخواہی رسینگک‘ ہراڑے او تین پہ تینی حوال کننگ‘ کاروباری شریداری نا پوسکن آ گمان تا پٹ وپول کننگ و زرکاری نا وارخواہی تیان فائدہ ہرفنگ کیرہ۔ وائس چیئرمین پارے کہ بلوچستان نا زرگزرانی شونداری کن المی ءِ کہ پرائیویٹ بشخ نا است بڈی کننگے و ہندی کاروباری تپہ ءِ قومی و جہانی منڈی تسکان رسینگ گیگ نا وارخواہی فراوان کننگے۔ ایکسپو نا کمک اٹ صوبہ ٹی جوڑ مروک گڑا‘ ہندی کاروباری لائخی و زرکاری نا قابل ڈٹ آتے نمان کننگک۔ ہراڑان نئے بیرہ کاروباری سرجز آتیٹی ودکی مریک بلکہ روزگار نا پوسکن وارخواہی ودی کننگ اٹی ہم کمک رسینگک۔